“Бахт овчиси” сериалидаги Зуля Боситовна роли билан томошабинларга яхши таниш бўлган актриса Барчин Ғофурова бу ролга нима сабабдан рози бўлгани ва суратга олиш ишлари якунланмай онасининг оғир хасталикка чалингани ҳақида сўзлаб берди.
— “Бахт овчиси” фильмига таклиф этишган пайтда молиявий жиҳатдан қийналаётган пайтларимиз эди. Совиткичнинг ичи бўш, ҳатто ейишга нонимиз бўлмаган пайтда сериалдан таклиф тушди. Онам билан маслаҳатлашганимда сценарийни ўқиб “Иккинчи хотин мавзуси экан, нима қиласан энди. Танлаган касбинг шу, рози бўлавер”, деган.
Фильмнинг биринчи мавсуми учун кунлик гонорарим 233 минг сўм этиб белгиланган. Улар бир ойдан кейин гонораримни кўтаришга ваъда беришган эди, аммо турли сабабларга кўра бу амалга ошмади. Кам пул беришса ҳам ролимни яхши кўрганим учун бирор марта бундан нолиганим йўқ. Тўққиз ой давомида бир оиладек бўлиб ишладик. Вақти келса, сёмка учун объектлар топишга ёки ролга мос актрисаларни танлашга ҳам ёрдамлашдим.
Сериалнинг биринчи мавсуми энг юқори рейтингни забт этди. Унинг муваффақиятидан хурсанд бўлиб юрганимда онамнинг бирдан тоби қочиб касалхонага тушиб қолди. Онамга қўйилган саратон ташхиси мени шок ҳолатга туширди. Шифокорлар зудлик билан кимётерапия муолажаларини бошлаш кераклигини айтишди. Унинг бари катта маблағни талаб этарди.
Шу боис иккинчи мавсумда кунлик гонорарни 100 АҚШ доллари қилишларини сўрадим. Бошқа пайт бўлса ундай қилмасдим, аммо онам ва укам касал бўлиб даволанаётганида 233 минг сўм гонорарга ишлай олмасдим. Албатта, бу талабим ҳеч кимга ёқмади. Танилиб бўлгандан кейин атайин, деганлар ҳам бўлди. Ҳатто мени ролдан четлаштириб, янги актрисалар учун кастинг ҳам эълон қилишди. Аммо канал раҳбарларидан бири бўлган Сардор Комилов “Агар Барчиннинг ролини бошқа актриса ижро этадиган бўлса, шунча қилган сёмкаларинг учун ҳақ тўламаймиз”, дебди. Шундай кейингина мен билан муносабатларни тиклашга ҳаракат қилишди. Аммо анча вақтгача режиссёр ва баъзи инсонлар совуқ муносабатда бўлишди, — дейди актриса Барчин Ғофурова.
Актриса отаси билан бугунги муносабати ва исмини ўзгартиришига нималар сабаб бўлгани ҳақида айтиб ўтди.
— Ўн тўрт ёшимдан кейин дадамни кўрмаганман. Бир неча марта алоқаларни тиклашга ҳаракат қилдим. Аммо у инсон муносабатларни тиклашга ҳаракат қилмаган. Интервьюларнинг бирида дадам ҳақида гапирганимдан кейин дадамнинг бошқа турмушидан бўлган фарзандлари Instagram орқали алоқага чиқишди. Аммо негадир ёзгим келмади.
Илгари исмим Умида бўлган, кейин уни Барчинга ўзгартиришга қарор қилганман. Бу исм менга қандайдир куч бағишлайди. Балки исмимни ўзгартирганим сабаб мени танимагандир, — дейди Барчин Ғофурова.
Изоҳ (0)