“Toshkentda pivo festivali o‘tkazgan va unga ruxsat berganlar jazolanishi kerak” — Alisher Qodirov

Deputat Alisher Qodirov fikricha, poytaxtdagi pivo festivali tashkilotchilari javobgarlikka tortilishi lozim. Chunki O‘zbekistonda spirtli ichimliklar reklamasi va targ‘iboti qonunan taqiqlangan.

Joriy yil 27—29-iyun kunlari Toshkent shahrining Taras Shevchenko ko‘chasida pivo festivali o‘tkazilgan.

“Milliy tiklanish” partiyasi raisi o‘rinbosari Feruza Muhamedjonova: “bu tadbir xalqning milliy anʼana va o‘zligiga tupurish”, deya keskin munosabat bildirdi. Partiya raisi Alisher Qodirov hamkasbi fikrlariga qo‘shimcha ravishda festival tashkilotchilari jazolanishi lozimligini taʼkidladi.

Deputat Telegram’dagi kanalida yozgan postida “Reklama to‘g‘risida”gi qonunni eslatgan. Qonunda har qanday alkogolli ichimliklar reklamasi, alkogolli ichimliklar nomi, belgisi yoxud tasviridan foydalaniladigan tadbirlarda homiylik qilish taqiqlanganiga urg‘u bergan.

“Bu festivalni o‘tkazgan va o‘tkazishga ruxsat berganlar javobgarlikka tortilishi kerak”, deya fikr bildirgan partiya rahbari.

Avvalroq Feruza Muhamedjonova poytaxtda pivo festivalini har yili o‘tkazish anʼanaga aylanib borayotganidan xavotir bildirgandi.

“Pivo festivalini aynan Toshkentda o‘tkazish — bu shunchaki faollar yoki biznes tashabbusi emas, balki xalqni milliy anʼanalari va o‘zligiga tupurishdir. Bugun pivo, ertaga vino, keyin spirtli barlar hech qanday madaniy cheklovsiz tadbirlar — shunday ketma-ketlikda jamiyatni sezdirmasdan o‘zgartirish mumkin. Albatta, kimning nima ichishi uning shaxsiy tanlovi. Lekin bu tanlov jamoat joyida, butun jamiyat ko‘z o‘ngida targ‘ib etilishiga yo‘l qo‘yib bo‘lmaydi. Erkinlik tushunchasi madaniyatsizlik va hadsizlikka aralashib ketsa, bu jamiyatning o‘zligini yo‘qotishidan darak”, deb yozgan partiya vakili Facebook’da.

“Reklama to‘g‘risida”gi qonunda alkogolli ichimliklar targ‘ibotiga yo‘l qo‘yilmasligi qatʼiy belgilangan. Xususan, reklamalarda bunday mahsulotlar isteʼmoli muvaffaqiyatga erishish, jismoniy yoki ruhiy holat yaxshilanishiga olib kelishini ifodalash taqiqlanadi. Qonunga ko‘ra, pivoni reklama qilishda madaniy-ko‘ngilochar, ommaviy va sport tadbirlariga homiylik qilishga yo‘l qo‘yilmaydi.