Saudiya Arabistoni klubi Neymarga yiliga 80 million yevro maosh va’da qilmoqda

“PSJ” hujumchisi Neymar faoliyatini Saudiya Arabistonida davom ettirishi mumkin.

Avvalroq, braziliyalik futbolchi Parij klubini tark etishini ma’lum qilgandi.

L’Equipe nashrining xabariga ko‘ra, Neymarga “Al-Hilol” jamoasi qiziqish bildirmoqda. Saudiyaliklar futbolchiga yiliga 80 million yevro maosh va’da qilgan. 

Neymar Saudiya Arabistoni ligasiga o‘tishni inkor qilmayapti, biroq uning asosiy maqsadi raqobatbardoshroq chempionatlarda to‘p surish. U Braziliyaning 2026-yilgi Jahon Chempionati uchun qaydnomasiga kirishni rejalashtirmoqda. 

Braziliyalikning “Barselona”ga qaytish varianti eng ma’quli edi, biroq kataloniyaliklar moliyaviy muammolar tufayli bu transferni rasmiylashtira olmaydi. “Ko‘k-anorranglilar” Neymarni keyinchalik sotib olish huquqi bilan ijaraga olishi mumkin edi, lekin hozirda Usmon Dembelening “PSJ”ga o‘tishi bilan bog‘liq mashmashalar tufayli klublar o‘rtasidagi munosabatlar yomonlashgan. 

Shuningdek, 31 yoshli futbolchiga Angliyaning “Chelsi” jamoasi ham qiziqish bildirmoqda.