APL “Chelsi”ni jarimaga tortishi va ochkolardan mahrum qilishi mumkin

Angliya Premyer Ligasi “Chelsi”ning Roman Abramovich davridagi maxfiy ofshor kompaniyalarga qilgan to‘lovlarini tekshirmoqda.

Daily Mail nashrining xabar berishicha, klubning yang xo‘jayinlari uni sotib olish jarayonida bir qancha tartibsiz bitimlarni aniqlagan va bu haqida Angliya futbol assotsiatsiyasi (FA), Premyer Liga va UEFAni xabardor qilgan. 

Qoidalar buzilishi Abramovich davrida sodir bo‘lgan bo‘lsa-da, “Chelsi” Premyer Ligadan jarima va ochkolardan mahrum qilinish shaklida jazolanishi mumkin. 

Ishdan xabardor manbalarning bayoniga ko‘ra, oltiga yaqin ofshor kompaniyalarga to‘lovlar aniqlangan. Millionlab hisoblangan to‘lovlar FA, APL va UEFAga taqdim etilgan moliyaviy hisobotda ro‘yxatga kiritilmagan futbolchilarning transferi bilan bog‘liq. 

Bundan tashqari ofshor kompaniyalarining bir qismi futbol agentlari va vositachilari bilan, ba’zilari esa Rossiya bilan aloqador bo‘lgan, ammo boshqa kompaniyalar ortida kim turganini aniqlashning imkoni bo‘lmagan. 

Eslatib o‘tamiz, 2022-yilning bahorida rossiyalik tadbirkor Roman Abramovich “Chelsi”ni sotib yuborgandi. Tod Bouli boshchiligidagi konsorsium “aristokratlar”ning yangi xo‘jayiniga aylangan.