Ўзбекистонда шу йилнинг дастлабки 6 ойида қайд этилган никоҳлар сони ўтган йилнинг мос даврига қараганда 10 000 тага камайди. Бу ҳақда Статистика агентлиги маълумот берди.
Республикада январь июнь ойларида жами 98 700 та никоҳ тузилди. Шундан шаҳар жойларида 49 400 та (50 фоиз), қишлоқ жойларида 49 300 та (50 фоиз) оила қурилган.
Қайд этилган никоҳларда аёлларнинг ўртача ёши 23,3 ёшни, эркакларнинг ўртача ёши эса 27,9 ёшни ташкил этган. Никоҳларнинг энг катта улуши 25 ёшгача бўлган аёлларга (74,6 фоизи) тўғри келган.
Никоҳланганларнинг 70,2 фоизини 20–30 ёшли фуқаролар, 14,7 фоизини 20 ёшгача бўлганлар, 10,9 фоизини 31–40 ёшлилар, 4,2 фоизи 41 ва ундан катта ёшдагилар ташкил этган.
Январь–июнь давомида энг кўп никоҳлар Самарқанд (10 336 та) ва Фарғона (10 193 та) вилоятларида қайд этилган. Энг кам никоҳлар Сирдарё (2 394 та) ва Навоий (2 768 та) вилоятларида рўйхатга олинган.
Никоҳларнинг ўсиш суръати энг юқори даражаси Хоразм, Фарғона, Навоий, Қашқадарё вилоятлари ҳамда Тошкент шаҳрида кузатилган. Энг паст ўсиш даражаси Тошкент, Жиззах, Андижон, Сирдарё вилоятлари ва Қорақалпоғистон Республикасида қайд қилинган.
Изоҳ (0)