“Daryo”da respublikaning Jizzax va Andijon viloyatlarida iyul oyi uchun bolalar puli to‘lab berilmagani, masʼullar bu muammo nafaqat Jizzax va Andijonda, boshqa viloyatlarda ham bor ekanini tan olgani yozilgan maqola eʼlon qilingandi. Mazkur maqoladan so‘ng “Daryo”ga respublikaning Surxondaryo, Qashqadaryo, Samarqand viloyatida yashovchi fuqarolar ham murojaat yo‘llab, bola puli kechikayotganidan shikoyat qildi.
Tahririyatga Samarqand viloyatining Payariq tumanidan 2023-yilning 3-avgust kuni murojaat yo‘llagan Umida Allayeva 2023-yilning iyul oyi uchun bola puli olmaganini, mablag‘ kechikkani bois bolalar bog‘chasi uchun to‘lov qilishda muammolarga duch kelayotganini maʼlum qildi.
Imkoni bo‘lsa, surishtirishni to‘xtatmang, mendan oldin murojaat qilganlar Andijon va Jizzax viloyatida yashovchilar ekan, shu muammoni aniqlashtirishda yordam bering, — deydi murojaatchi.
Qashqadaryo viloyatining Shahrisabz tumanida yashovchi fuqaro ham tahririyatga murojaat qoldirib, bola pulini o‘z vaqtida ololmayotganini bildirgan.
Bola puli nega shu paytga qadar tushmayotgani va kechikayotgani sababi haqida maʼlumot bering. Bugun tushadi, ertaga tushadi, deb ortga surib kelishyapti. Ayrimlarga tushgan, lekin juda ko‘pchilik haligacha olmagan, — deydi qashqadaryolik murojaatchi.
Surxondaryo viloyatining Termiz tumanidan murojaat qilgan Nigora ismli fuqaroning aytishicha, ularda ham shu muammo bor.
Bizga haligacha pul tushmadi, yangilik yo‘q, — deydi bu haqda tahririyatga bildirgan murojaatchi.
Andijon viloyatining Andijon shahridan murojaat yo‘llagan Mubina Jo‘rayeva ismli fuqaro bola pulini olmaganini, muammo yuzasidan tushuntirish ham berilmaganini aytib, shikoyat qildi.
Iyul oyida bolalar pulining kechikishiga izoh bergan Iqtisodiyot va moliya vazirligi axborot xizmati rahbari Sarvinoz Ahmedova elektron tizimdagi muammolar sabab, jumladan, “vedemost” kech qolgani uchun iyul oyidagi bolalar puli kech to‘langanini maʼlum qildi.
Vazirlikning bildirishicha, bolalar nafaqasi Vazirlar Mahkamasining “Aholini ijtimoiy himoya qilish tizimini yanada takomillashtirish chora-tadbirlari to‘g‘risida” 2021-yil 21-oktabrdagi 654-son qaroriga asosan oyning 4-sanasidan 27-sanasiga qadar to‘lab beriladi.
Qo‘shimcha qilinishicha, joriy yilning iyul oyida “Ijtimoiy himoya yagona reyestri” AT orqali respublikadagi kam taʼminlangan oilalarga 949,4 milliard so‘m ijtimoiy nafaqa to‘lab berilgan.
Izoh (0)