Namangan viloyatida sud qarorini uch oyga kechiktirib berish evaziga pul so‘ragan soxta advokat qo‘lga olindi. Bu haqda viloyat IIB axborot xizmati xabar berdi.
Ma’lum qilinishicha, 19-iyul kuni Norin tumanida yashovchi fuqaro DXX Namangan viloyati boshqarmasi va viloyat IIB boshlig‘i nomiga ariza bilan murojaat qilgan. U o‘z arizasida shu tumanda yashovchi shaxs fuqarolik ishlari bo‘yicha Uchqo‘rg‘on tuman sudiga yozgan arizasi yuzasidan fuqaroni yashash xonadonidan majburiy tartibda chiqarish masalasi bo‘yicha hozir ish jarayonlari ko‘rib chiqilayotgani, o‘zini advokat deb tanishtirgan shaxs esa sudyaga pora berish orqali sudning majburiy tartibda uydan chiqarish haqidagi qarorini 3 oy muddatga qoldirib berishni va’da qilganini bildirgan. Ushbu shaxs arizachidan “o‘z xizmati evaziga” 200 AQSH dollari talab qilgan.
Mazkur ariza yuzasidan o‘tkazilgan hamkorlikda tezkor tadbir davomida arizada nomi keltirilgan shaxs 200 dollarni olgan vaqtida ashyoviy dalillar bilan ushlangan.
Holat yuzasidan Norin tumani IIB huzuridagi Tergov bo‘linmasi tomonidan Jinoyat kodeksining 168-(firibgarlik) va 211-moddalari (pora berish) bilan jinoyati ishi qo‘zg‘atilgan.
Tergovga qadar tekshiruv davomida ushbu shaxs hech qanday yuridik ma’lumotga ega emasligi, hozirga qadar u advokatlik firmasida oddiy ishchi sifatida faoliyat yuritishi ma’lum bo‘lgan.
Aprel oxirlarida Toshkent viloyatida soxta sertifikat evaziga haydovchilik guvohnomasi olgan fuqaroga sud hukmi o‘qilgandi. Unga Jinoyat kodeksining 59-moddasiga asosan tayinlangan jazolarni qisman qo‘shish yo‘li bilan uzil-kesil o‘tash uchun ish haqining 20 foizini davlat daromadi hisobiga ushlab qolgan holda 2,5 yil muddatga axloq tuzatish ishlari jazosi tayinlangan. May o‘rtalarida bo‘lsa, Farg‘onada 200 dollarga “prava” olib berishni va’da qilgan avtomaktab rahbari ushlangandi.
Izoh (0)