Rossiya qo‘shinlari Dneprdagi ko‘p qavatli turar joy binosiga raketa hujumi uyushtirdi. Bu haqda Ukraina Ichki ishlar vazirligi rahbari Igor Klimenko ma’lum qildi.
Ukraina IIV xabariga ko‘ra, Dneprga berilgan zarba oqibatida besh kishi — 18 yoshdan 53 yoshgacha bo‘lgan to‘rt erkak va 77 yoshli ayol jarohatlangan.
Dnepropetrovsk viloyati maʼmuriyati rahbari Sergey Lisak uyning ikki qavati vayron bo‘lganini aytdi. Uning so‘zlariga ko‘ra, bino hali foydalanishga topshirilmagan edi. Keyinroq Lisak jabrlanganlar soni to‘qqiz kishiga yetganini, ular orasida ikki voyaga yetmagan borligini aytdi.
Ukraina ommaviy axborot vositalari va Telegram kanallarida chop etilgan video va fotosuratlarga qaraganda, zarba oqibatida uyning yuqori qavatlari shikastlangan.
Ko‘p qavatli uyga snaryad tushgani haqidagi xabarlardan so‘ng Ukraina prezidenti ofisining rahbari Andrey Yermak o‘zining Telegram-kanalida “Rus terrorchilari” deb yozdi.
UNIAN shuningdek, Rossiya qo‘shinlari Dneprdagi Ukraina xavfsizlik xizmati mintaqaviy boshqarmasi binosiga hujum qilgani haqida xabar berdi. Bu maʼlumotni Ukraina prezidenti Vladimir Zelenskiy ham tasdiqladi. Dnepr meri Boris Filatovning so‘zlariga ko‘ra, Rossiya qo‘shinlari hujumiga uchragan UXX binosi bo‘sh edi.
Izoh (0)