Россия қўшинлари Днепрдаги кўп қаватли турар жой биносига ракета ҳужуми уюштирди. Бу ҳақда Украина Ички ишлар вазирлиги раҳбари Игор Клименко маълум қилди.
Украина ИИВ хабарига кўра, Днепрга берилган зарба оқибатида беш киши — 18 ёшдан 53 ёшгача бўлган тўрт эркак ва 77 ёшли аёл жароҳатланган.
Днепропетровск вилояти маъмурияти раҳбари Сергей Лисак уйнинг икки қавати вайрон бўлганини айтди. Унинг сўзларига кўра, бино ҳали фойдаланишга топширилмаган эди. Кейинроқ Лисак жабрланганлар сони тўққиз кишига етганини, улар орасида икки вояга етмаган борлигини айтди.
Украина оммавий ахборот воситалари ва Telegram каналларида чоп этилган видео ва фотосуратларга қараганда, зарба оқибатида уйнинг юқори қаватлари шикастланган.
Кўп қаватли уйга снаряд тушгани ҳақидаги хабарлардан сўнг Украина президенти офисининг раҳбари Андрей Ермак ўзининг Telegram-каналида “Рус террорчилари” деб ёзди.
UNIAN шунингдек, Россия қўшинлари Днепрдаги Украина хавфсизлик хизмати минтақавий бошқармаси биносига ҳужум қилгани ҳақида хабар берди. Бу маълумотни Украина президенти Владимир Зеленский ҳам тасдиқлади. Днепр мери Борис Филатовнинг сўзларига кўра, Россия қўшинлари ҳужумига учраган УХХ биноси бўш эди.
Изоҳ (0)