Ukraina armiyasi Odessadagi portlarni Rossiya hujumidan yetarlicha himoyalay olmayotgani sababini tushuntirdi

Ukraina armiyasida Rossiyaning Odessadagi don infratuzilmasiga uyushtirayotgan hujumlarini qaytarish uchun yetarlicha havo hujumidan mudofaa tizimlari yo‘q, dedi Ukraina Qurolli kuchlarining “Janub” operativ qo‘mondonligi matbuot kotibi Natalya Gumenyuk. Rossiya don bitimidan chiqqanidan keyin Odessa portlariga deyarli har kuni zarba bermoqda.

“Bizga raketa va havo hujumiga qarshi mudofaa tizimlari kerak. Kuchli, zamonaviy va dushmanning har qanday turdagi raketasiga qarshi turishga qodir vositalar kerak”, — dedi Gumenyuk AFP agentligiga bergan intervyusida.

Gumenyuk Rossiya armiyasi bir vaqtning o‘zida qanotli, gipertovushli va kemaga qarshi raketalarni uchirayotganini, shuning uchun havo mudofaa tizimlari “bu tahdidga qarshi turolmayotganini” tushuntirdi. Uning qo‘shimcha qilishicha, Rossiya “har safar o‘z taktikasini takomillashtirib boryapti”.

Gumenyukning so‘zlariga ko‘ra, havo hujumidan mudofaa tizimlaridan tashqari, ukrainalik harbiylarga mamlakat janubiga zarba berayotgan Rossiya harbiy kemalarini yo‘q qilish uchun Amerikaning F-16 qiruvchi samolyotlari kerak.

“Ikki-uch oy ichida bizda birorta ham port qolmasligi mumkin. Rossiya Qora dengizda hukmronlik qilmoqchi. Ular don eksportida monopoliyaga ega bo‘lishni istaydi. Ular Ukrainani dunyoni boqishga qodir mamlakat sifatidagi rolidan mahrum qilmoqchi”, — deb xulosa qildi Gumenyuk va Rossiya harbiylari Ukraina portlarini blokada qilishni qayta boshlaganini qo‘shimcha qildi.

18-iyuldan beri Rossiya Ukraina janubidagi, jumladan Odessadagi port infratuzilmasi obyektlariga hujum qilib, buni Qrim ko‘prigidagi portlashga javob, deb atamoqda.

23-iyulga o‘tar kechasi Odessa markazi urush boshlanganidan beri eng ko‘p o‘qqa tutildi, buning oqibatida shahardagi eng yirik pravoslav cherkovi – Preobrajenskiy kafedral sobori vayron qilingan. Bir kishi halok bo‘lgani va 19 kishi yaralangani xabar qilingan.

Rossiya Mudofaa vazirligi sobor Rossiya hujumi nishoniga aylanganini inkor etib, bino “Ukraina havo hujumidan mudofaa operatorlarining no‘noq harakatlari” tufayli vayron bo‘lganini da’vo qilmoqda.