Buxoro va Surxondaryo viloyatlarida yo‘l qurilish ishlari munosabati bilan ko‘p sonli daraxt va butalar ko‘chirilishi mumkinligi haqida xabar berilgan edi. Ekologiya, atrof-muhitni muhofaza qilish va iqlim o‘zgarishi vazirligi holat yuzasidan ma’lumot berdi.
27-iyul kuni bo‘lib o‘tgan matbuot anjumanida ekologiya vaziri birinchi o‘rinbosari Obidjon Qudratov ushbu masala yuzasidan fikr bildirib, loyiha hujjatlari vazirlik bilan kelishilmagani, rad etilganini aytgandi.
Vazirlik e’lon qilgan ma’lumotga ko‘ra, 2023-yil 6-iyul kuni Buxoro viloyati hokimligi A-380 avtomobil yo‘lining 150-228 kilometr uzunlikdagi G‘uzor—Buxoro—Nukus—Beynov qismini rekonstruksiya qilish loyihasini tasdiqlash uchun Ekologiya vazirligiga yuborgan. Loyihada 31 371 ta daraxt va butalarni yaqin atrofdagi bo‘sh joylarga ko‘chirib o‘tkazish ko‘zda tutilgan.
Shu bilan birga, 7-iyul kuni Surxondaryo viloyati hokimligi tomonidan 4R-100 Mang‘uzor—Jarqo‘rg‘on—Bandixon—Oltinsoy—Denov avtomobil yo‘lining 128-174 kilometri va 4R-105 Darband—Boysun—Elbayon avtomobil yo‘lining 5-70 kilometri qismlarini rekonstruksiya qilish loyihasi yuzasidan 21 803 dona daraxtni belgilangan tartibda ko‘chirib o‘tkazishda amaliy yordam so‘rab murojaat qilingan.
Bosh vazir o‘rinbosari Jamshid Xo‘jayev tomonidan imzolangan hukumat komissiyasining 2023-yil 21-iyuldagi bayonnomasiga muvofiq, Ekologiya, atrof-muhitni muhofaza qilish va iqlim o‘zgarishi vazirligiga bir hafta muddatda daraxtlarni atrof-muhitga zarar yetkazmasdan ko‘chirish bo‘yicha hukumat komissiyasiga xulosa berish va tegishli takliflar kiritish topshirilgan.
Ta’kidlanishicha, ushbu hujjatda daraxtlarni kesish haqida birorta ham so‘z, shuningdek, bunday issiq mavsumda yashil maydonlar bilan biror-bir chora ko‘rish bo‘yicha ko‘rsatmalar yo‘q.
Ekologiya, atrof-muhitni muhofaza qilish va iqlim o‘zgarishi vazirligi ushbu murojaatlarga javoban o‘simlik dunyosi obyektlarini nobud qilish yoki ularga shikast yetkazish bilan bog‘liq jinoyatlar og‘ir jinoyatlar toifasiga kiritilishi, shuningdek, respublika bo‘ylab kuzatilayotgan chang-to‘zon va qum bo‘ronlari taʼsirini kamaytirishda ushbu daraxt va butalarning o‘rni muhim ekanligini eslatgan holda rad javobini bergan.
Hokimliklarga yuborilgan rasmiy javoblardan so‘ng Buxoro viloyatidan qurilish kompaniyasi vakillari vazirlikka tashrif buyurib, daraxt va butalarga zarar yetkazmagan holda loyihaga o‘zgartirishlar kiritishlari haqida maʼlumot bergan.
Izoh (0)