“O‘zbekiston temir yo‘llari” AJ jazirama issiq tufayli poyezdlar harakat tezligiga cheklovlar o‘rnatilishini e’lon qildi.
“Ayni kunlarda respublikamiz hududida keskin anomal issiq ob-havo kuzatilmoqda. Albatta, harorat ko‘tarilishi natijasida yer usti temiryo‘llarining relslari hamda ularning po‘lat qismlarida harorat juda yuqori bo‘ladi. Shu bois, yo‘lovchilar va poyezdlar harakat xavfsizligini taʼminlash maqsadida, poyezdlar harakat tezligiga cheklovlar o‘rnatiladi. Natijada poyezdlar harakat jadvalidan kechikib harakatlanishi mumkin”, — deyiladi xabarda.
Shuningdek, harakat tezligiga cheklovlar o‘rnatilgan poyezdlarda sovitish tizimining ishlash quvvati pasayishi mumkinligi ham aytilmoqda.
“O‘ztemiryo‘lyo‘lovchi” AJ o‘z mijozlaridan, anomal issiqlik tufayli yuzaga kelishi mumkin bo‘lgan noqulayliklar uchun uzr so‘raydi.
2022-yilda O‘zbekistonda anomal issiq ob-havo sabab poyezdlar jadvaliga o‘zgartirish kiritilishi haqida xabar qilingandi. Issiq ob-havo ta’sirida yuz berayotgan bu amaliyot birinchi marta emas. O‘tgan yilning iyun oyida ham ikki marta poyezdlar tezligi kamaytirilib, qatnov jadvaliga o‘zgartirish kiritilgan.
Izoh (0)