O‘zbekiston Oliy sudi 2018—2022-yillar hamda 2023-yilning birinchi choragida sudlarda ma’muriy huquqbuzarliklarga doir ishlarning ko‘rilishi dinamikasini e’lon qildi.
Unga ko‘ra, Ma’muriy javobgarlik to‘g‘risidagi kodeksning 131-moddasi — transport vositalarini mast holda boshqarish bo‘yicha 2023-yilning uch oyida 5 709 ta ish ko‘rib chiqilgan.
Mast holda transport boshqarish bo‘yicha eng ko‘p holatlar Samarqand viloyatida qayd etilgan — 900 ta. Eng kam holat esa Sirdaryo viloyatida — 142 ta. Toshkent shahrida mast holda mashina boshqarish bo‘yicha 339 ta ma’muriy ish ko‘rib chiqilgan.
Shu bilan birga, bunday huquqbuzarliklar soni 4 yil davomida kamayib borganini ko‘rish mumkin. 2019-yilda transport vositalarini mast holda boshqarish bo‘yicha jami 26 814 ta ma’muriy ish ko‘rib chiqilgan bo‘lsa, 2020-yilda bu ko‘rsatkich 23 063 tani, 2021-yilda 25 680 tani, 2022-yilda 23 960 tani tashkil etgan.
Ma’muriy javobgarlik to‘g‘risidagi kodeksning 136-moddasi — transport vositalari haydovchilarining va yo‘l harakati boshqa ishtirokchilarining mastligi yoki mast emasligini aniqlash uchun tekshiruvdan o‘tishdan bo‘yin tovlashi bo‘yicha 2023-yil birinchi choragida 1 795 ta ma’muriy ish ko‘rilgan. Bu huquqbuzarlik bo‘yicha eng ko‘p holatlar Farg‘ona viloyatida (488 ta), eng kami esa Buxoro viloyatida (4 ta) qayd etilgan.
Izoh (0)