Бош вазир Абдулла Арипов бошчилигидаги делегация 17–18 июль кунлари Тбилисида бўлиб, Грузия ҳукумати билан музокаралар ўтказди.
Ўзбекистон ҳукумати матбуот хизматининг хабар қилишича, Абдулла Арипов Грузия бош вазири Ираклий Гарибашвили бошчилигидаги икки мамлакат ҳукуматлари делегациялари йиғилишида Олий даражада эришилган келишувлар ижросини таъминлаш, икки томонлама ҳамкорлик алоқаларини янада ривожлантириш масалалари муҳокама қилинди.
Йиғилишда Ўзбекистон томони Грузияга электротехника маҳсулотлари, автомобиллар, тайёр тўқимачилик маҳсулотлари, сархил ва қуруқ мева-сабзавотлар, полимер ва кимё маҳсулотлари етказиб беришга тайёрлиги билдирилди.
Маълум қилинишича, бугунги кунда икки давлат компаниялари иштирокида амалга оширилиши режалаштирилган кўплаб инвестиция лойиҳалари ва савдо шартномалари рўйхати имзолаш учун тайёрланган.
Йиғилишда транспорт-логистика соҳасидаги ҳамкорлик мамлакатлар ўртасидаги муносабатларнинг устувор йўналишларидан бири эканлиги қайд этилди.
Шунингдек, Ўзбекистон ва Грузиянинг бой маданий ва тарихий мероси туризм соҳасини янада ривожлантириш, маданий-гуманитар алмашинувларни кўпайтириш учун қулай замин яратмоқда. Бунинг учун келгусида биргаликда турлар ташкил этиш, меҳмонхона бизнесида сайёҳлик компаниялари ва тузилмалари ўртасида ҳамкорликни йўлга қўйиш зарур.
Йиғилиш якунида қатор икки томонлама ҳужжатлар имзоланди.
Ўзбекистон ҳукумати делегациясининг Грузияга расмий ташрифи доирасида Батуми ва Поти шаҳарларидаги халқаро денгиз портлари фаолияти билан ҳам яқиндан танишилди.
Грузия бош вазирининг 2022 йил Ўзбекистонга ташрифи чоғида Шавкат Мирзиёев қабулида бўлиб, икки томонлама амалий ҳамкорликни янада кенгайтиришга келишиб олинганди.
Изоҳ (0)