Angliyaning “Kristal Pelas” jamoasi 75 yoshli murabbiy Roy Hojson bilan shartnomani uzaytirdi. Hojson hozirda faoliyatini olib borayotgan eng yoshi katta murabbiylardan biri.
Lekin Roy yagona superfaxriy emas.
Luchesku — eng yoshi katta murabbiy
Birinchi o‘rinda 77 yoshli Mircha Luchesku. U shartnoma bo‘yicha Kiyevning “Dinamo” jamoasi murabbiyi, biroq so‘nggi vaqtlarda kasalligi sabab, operatsiya bo‘lgach, uning o‘rnini yordamchisi Aleksandr Shovkovskiy egallab turibdi.
Keyingi o‘rinda Roy Hojson. Mart oyida angliyalik mutaxassis “Kristal Pelas” boshqaruviga o‘tdi va klubni quyi ligaga tushib ketishdan qutqarib qoldi. Mavsum yakunlangach, klub murabbiy bilan shartnomani uzaytirdi. Qiziq ma’lumot: Hojson “Real”ning “Santiago Bernabeu” stadionidan 127 kunga katta.
Hojsondan tashqari top-ligalarda yana ikki murabbiy ishlaydi: Klaudio Ranyeri (“Kalyari”ni A Seriyaga olib chiqdi) va Laslo Boloni (“Mets” bilan birga Liga 1 ga chiqdi). Shuningdek, Shenol Gyunesh ham bor: mutaxassis “Beshiktosh” bilan Turkiya chempionatida uchinchi o‘rinni egalladi va YCHL saralash bosqichi yo‘llanmasini qo‘lga kiritdi.
Uch nafar yoshi katta murabbiylar terma jamoalar boshqaruvida. Karlush Keyrush Qatarda bo‘lib o‘tgan mundialdan so‘ng Qatarni qabul qilib oldi. Gernot Ror Benin terma jamoasini ikki yildan buyon boshqarib kelmoqda. Oge Hareyde aprel oyida Islandiya terma jamoasi taklifini qabul qildi. Unga 74 yoshli Lars Lagerbek yordamchi bo‘ladi.
Hozirda ishsiz bo‘lib turganlardan “Latsio” sobiq murabbiyi Edoardo Reyya, barcha Portugaliya toplari bilan ishlagan Jezualdu Ferreyra, urugvaylik Oskar Tabareslarni ajratib ko‘rsatish mumkin. Agar ular hozir ham ishlaganida, Hojsondan yuqorida turardi.
APLda nima gap?
Roy birinchi o‘rinda ekan. Undan keyingilar kim?
Ikkinchi o‘rindan Devid Moyes joy olgan. 60 yoshli mutaxassis yaqinda “Vest Hem” bilan birga Konferensiyalar Ligasi g‘olibiga aylandi. Bu murabbiy uchun faoliyatidagi ikkinchi sovrin bo‘ldi. “Bunga ishongim kelmaydi. Unchalik qari emasman. O‘zimni juda yaxshi his qilyapman. Balki, futbol yoshlar uchundir, biroq, tajribali murabbiylarga doim joy topilgan”, — deydi Moyes.
“Tottenhem”ning yangi murabbiyi Enju Postekoglu 57 yoshda. Undan keying o‘rinda “Vulverhempton” murabbiyi Xulen Lopetegi va Yurgen Klopp bormoqda. Ikkala mutaxassis ham 56 yoshda. Nemis “Liverpul”ni 8 yildan buyon boshqarmoqda.
Liganing eng yosh murabbiyi — Vensan Kompani. U “Byornli”ni APLga olib chiqqanda 37 yosh 2 oy va 25 kunlik edi.
Dunyodagi eng yoshi katta murabbiy 87 yoshda
Tanishing, bu Larri Barilli. U hech qachon professional darajada ishlamagan, lekin Shotlandiya havaskor futbol assotsiatsiyasi Larrining 2000 dan ortiq o‘yin o‘tkazganini tasdiqlaydi.
U 70 yildan buyon murabbiylik qiladi. Shu vaqt davomida Grinok shahrining yettita jamoasi bilan ishlashga muvaffaq bo‘lgan. Faqatgina 7 ta o‘yinnigina kasallik sabab o‘tkazib yuborgan. Barilli 1953-yildan buyon ishlab kelmoqda.
2019-yil sentabr oyida Barilli Shotlandiya futbol assotsiatsiyasi tomonidan futbol rivojiga qo‘shgan hissasi uchun mukofotlangan.
Izoh (0)