O‘zbek shou-biznesida san’atdan tashqari boshqa sohada faoliyat yuritayotgan va shu sohalardan daromad topayotgan mashhurlar ham bor. Quyida boshqa sohada tahsil olib, san’atda mashhur bo‘lgan ijodkorlar haqida ma’lumot beriladi.
Muzaffar Sa’dullayev
“Osmondagi bolalar” filmidagi Hamdam roli bilan tomoshabinlarning e’tirofiga sazovor bo‘lgan Muzaffar Sa’dullayev aktyorlik sohasida tahsil olmagan. O‘z rolini mahorat bilan ijro etgan aktyor mohir hunarmand hisoblanadi. U bir necha yil davomida Toshkentdagi “Chorsu” bozorida temirchilik sirlarini o‘rgangan va rejissor Zulfiqor Musoqov aktyorni o‘sha yerda uchratib qolib, “Osmondagi bolalar” filmida suratga tushishga taklif qilgan. Hozirda aktyor filmlarda suratga tushishni va tunukachilik bilan shug‘ullanishni davom ettirmoqda. Muzaffar Sa’dullayev buxgalteriya sohasi bo‘yicha diplomga ham ega.
Ozod Shukrullayev
Stendap yo‘nalishi va vaynlari bilan mashhurlikka erishgan Ozod Shukrullayev Toshkent tibbiyot akademiyasida jarrohlik sohasida tahsil olgan. U o‘sha paytlardan oylik maoshi yetmagani sababli ijodga kirib kelgan. Hozirda Ozod Shukrullayev ijod bilan shug‘ullanish bilan birga Toshkentdagi xususiy klinikalarning birida jarroh sifatida faoliyat yuritadi.
Malika Rahimova
Aktrisa Malika Rahimova Toshkent markaziy vokzalida nozir bo‘lib ishlaydi. Hozirda uning sahnadagi vazifasi o‘z rollarini mahorat bilan ijro etish, vokzalda esa yo‘lovchilarning yuklarini, hujjatlarini tekshirishdan iborat. Malika Rahimovaning turmush o‘rtog‘i ham temiryo‘l sohasida faoliyat yuritadi.
Sug‘diyona Azimova
“Qaysarginam”, “Nafrat” filmlari, “Jurnalist” serialidagi rollari bilan tomoshabinlarga yaxshi tanish bo‘lgan aktrisa Sug‘diyona Azimova mahoratli stilist hisoblanadi. U san’at sohasida tahsil olmagan. Aktrisa 15 yildan buyon stilistlik bilan shug‘ullanadi.
Ra’no Shodiyeva
Aktrisa Ra’no Shodiyeva surdopedagogika sohasida tahsil olgan. U otasining eshitish bilan bog‘liq muammosi borligi sababli yoshligidan surdo tilini o‘rgangan. Imkoniyati cheklangan insonlarga befarq bo‘lmagan Ra’no Shodiyeva “Qo‘llar yordamida gaplashamiz” nomli tashkilotga asos soldi. U faoliyati davomida “O‘tov”, “Sarob”, “Vatan” va boshqa ko‘plab filmlarda suratga tushgan.
Aziz Umrzoqov
“Daydi qizning daftari” serialidagi roli bilan tomoshabinlarga tanish bo‘lgan Aziz Umrzoqov asli mutaxassisligi bo‘yicha aktyor emas. U O‘zbekiston Milliy universitetining Xalqaro iqtisodiy munosabatlar fakultetida tahsil olgan. San’atkor bo‘lishdan avval esa soliq sohasida faoliyat yuritgan.
Odina To‘xtasinova
“Sensiz”, “Sevgi” va “Shukrona” seriallaridagi rollari bilan tomoshabinlarga yaxshi tanish bo‘lgan aktrisa Odina To‘xtasinova asli mutaxassisligi bo‘yicha hamshira. Ammo qondan qo‘rqishi sabab bu sohada ishlay olmagan va xorij tilini o‘rganishga qaror qilgan.
— Ota-onam san’atkor bo‘lishimni istashmadi, shu bois maktabni tamomlab, hamshiralik bo‘yicha tahsil olgandim. Ammo mutaxassisligim bo‘yicha faoliyat yuritolmadim. Kollejni tamomlagach, bir muddat kasalxonada ishlaganman. Og‘ir ahvoldagi bemorlarni ko‘rib, ruhan qiynaldim. Shundan so‘ng tibbiyot sohasida ishlolmasligimni anglab yetdim. Ikki yil davomida xorij tilini o‘rgatuvchi o‘quv markaziga qatnadim. Koreys tilini mukammal o‘rganib, tarjimonlik faoliyatimni boshladim. Ammo bolalikdagi san’atga bo‘lgan ishtiyoqim so‘nmadi. Kastinglarda ishtirok etib turdim, — deydi aktrisa Odina To‘xtasinova.
Bahrom Nazarov
Xonanda Bahrom Nazarov temiryo‘l sohasida faoliyat yuritgan. U temiryo‘lchi bo‘lish niyatida Toshkentga keladi va taqdir taqozosi bilan Ozodbek Nazarbekov bilan uchrashadi.
— Boshqa tengdoshlarimga qaraganda menga ancha kech omad kulib boqdi. Ammo bundan o‘ksinmayman. Chunki hamma narsa vaqt-soati bilan bo‘ladi. 18 yoshimda Ozodbek Nazarbekov bilan tanishgan bo‘lsam, 30 yoshimda qo‘shig‘im orqali odamlar og‘ziga tushdim. 10 yil temiryo‘lda ishladim, — deydi Bahrom Nazarov.
Uning “Ayrildim”, “Yuraksiz”, “Qaramading” va boshqa bir qancha taronalari muxlislar tomonidan sevib tinglanadi.
Izoh (0)