Surxondaryoda 5 mlrd so‘mga qurilgan bog‘cha olti oy o‘tmay, bolalar uchun xavfli maskanga aylangani aytilmoqda. Quruvchi buni vahimali emas, dedi

Surxondaryo viloyatining Oltinsoy tumanida 2022-yil yakunida qurilib, 2023-yilning yanvar oyida foydalanishga topshirilgan 28-davlat maktabgacha taʼlim tashkilotining devorlari yorila boshladi. Bog‘cha direktoriga ko‘ra, maskan bolalar uchun xavfli deb topilgani bois vaqtincha yopildi.

“Kecha, 10-iyul kuni bolalarimizning uyga qaytish vaqtida yangi devorlarimiz cho‘kib, devor yorilgan. O‘yilib tushgan devor qoldiqlari bolalar boshiga ham tushgan. Bu haqda eshitishim bilan tuman markazidan bog‘chamga yetib keldim. Kelsam, ota-onalar ham vahimaga tushib qolgan. Bolalari bunday xavfli binoda tarbiyalanayotganidan xavotirga tushayotganini aytishdi. Shu sabab bugun bog‘chaga bolalarni qabul qilmadik. Binoni yopib, muammo haqida rahbarlarga xabar berdik”, — deydi qulab tushish arafasida ekani aytilayotgan tashkilot direktori Mahfuza Majidova.

Taʼkidlanishicha, mazkur bog‘cha 150 o‘rinli bo‘lib, ayni kunda unda 150 nafar bola tarbiyalanadi.

Oltinsoy tumanining “Hayrondara” mahallasida joylashgan 28-sonli davlat maktabgacha taʼlim tashkilotimiz 2022-yilning sentabr—oktabr oylarida qurila boshlangan bo‘lib, yil yakunida tayyor, deyildi. Ammo men bog‘cha jihozlari yetishmasligi, qish mavsumiga tayyor bo‘lmagani sabab bog‘chani qabul qilmadim. Yangi bog‘cha bo‘lsa-da, sovuqda kotyollar ishlamasdi. Kamchiliklarini tuzatdik, oching deyishgach, 2023-yil 4-yanvardan ish boshladik. Biroq ko‘p o‘tmay anomal sovuq sabab yana yopdik. O‘sha payti ham kotyollar ishlamasdi, oshxona jihozlari talabga javob bermas edi”, — deydi bog‘cha mudirasi.

“Daryo” jurnalisti bilan suhbatlashgan manbaning maʼlumot berishicha, 5 milliard 50 million so‘mga qurilib, 2023-yilning yanvarida foydalanishga topshirilgan bino 2023-yilning fevral oyida cho‘ka boshlagan.

Fevralda bino cho‘kishi sabab bog‘chamiz yopildi. Shundan so‘ng taʼmirlashdi. Yana ish faoliyatimizni davom ettirdik. Yana shunday muammo kuzatilgach, ikkinchi marotaba bog‘chani yopishga majbur bo‘ldik. Mart oyidan yana ishladik. May oylarida yana cho‘kishlar kuzatildi. Buni bilgan tuman hokimi bog‘chani yoping, bolalarni bunday xavfli joyda olib o‘tirmang, dedi. Yana yopdik. Bu safar ham taʼmirlagandek bo‘lishdi. Biroq, ko‘rib turganingizdek, yana devorlar yorilib, bino cho‘kishda davom etdi. Bu safar ham hali hech qanday zilzila bo‘lmasdan turib, devor o‘pirilib, bolalar ustiga tushdi. Quruvchi esa yana shunchaki taʼmirlash bilan kifoyalanmoqchi bo‘lyapti. Men bunday binoga qanday qilib bolalarni kiritaman?, — deydi bog‘cha rahbari.

Maʼlum bo‘lishicha, mazkur bino quruvchi Sirojiddin Mirzayev rahbarligidagi “Oltinsoy paxta servis” MCHJ tomonidan barpo etilgan. “Daryo” jurnalistining bu haqdagi savollariga javob bergan quruvchi Sirojiddin Mirzayev holat bu darajada vahimali emasligini aytmoqda.

Yo‘q, holat bu darajada vahimali emas. Sanuzel va mudira xonasining devorlarida yoriq paydo bo‘lgan. Bu binoning asosiy devori emas, shunchaki ichki qismdagi hech qanday ahamiyatga ega bo‘lmagan devor hisoblanadi. Mazkur kamchiliklarni uch, uzog‘i bilan to‘rt kunda bartaraf etib, bolalar uchun tayyor holatga keltirib beramiz, — deydi quruvchi Sirojiddin Mirzayev.

Quruvchi “Daryo” muxbirining “Bino siz aytgandek taʼmirlangach, bolalar uchun xavfsiz maskanga aylanadimi, ertaga biror-bir ko‘ngilsiz voqea ro‘y bermasligi aniqmi?”, degan savoliga “ha, hech qanday muammo kuzatilmaydi, binoning asosiy devorlari mustahkam va bolalar uchun xavfsiz”, deya javob berdi.

“Daryo” voqealar rivojini kuzatishda davom etadi.