Сурхондарёда 5 млрд сўмга қурилган боғча олти ой ўтмай, болалар учун хавфли масканга айлангани айтилмоқда. Қурувчи буни ваҳимали эмас, деди

Сурхондарё вилоятининг Олтинсой туманида 2022 йил якунида қурилиб, 2023 йилнинг январь ойида фойдаланишга топширилган 28-давлат мактабгача таълим ташкилотининг деворлари ёрила бошлади. Боғча директорига кўра, маскан болалар учун хавфли деб топилгани боис вақтинча ёпилди.

“Кеча, 10 июль куни болаларимизнинг уйга қайтиш вақтида янги деворларимиз чўкиб, девор ёрилган. Ўйилиб тушган девор қолдиқлари болалар бошига ҳам тушган. Бу ҳақда эшитишим билан туман марказидан боғчамга етиб келдим. Келсам, ота-оналар ҳам ваҳимага тушиб қолган. Болалари бундай хавфли бинода тарбияланаётганидан хавотирга тушаётганини айтишди. Шу сабаб бугун боғчага болаларни қабул қилмадик. Бинони ёпиб, муаммо ҳақида раҳбарларга хабар бердик”, — дейди қулаб тушиш арафасида экани айтилаётган ташкилот директори Маҳфуза Мажидова.

Таъкидланишича, мазкур боғча 150 ўринли бўлиб, айни кунда унда 150 нафар бола тарбияланади.

Олтинсой туманининг “Ҳайрондара” маҳалласида жойлашган 28-сонли давлат мактабгача таълим ташкилотимиз 2022 йилнинг сентябрь—октябрь ойларида қурила бошланган бўлиб, йил якунида тайёр, дейилди. Аммо мен боғча жиҳозлари етишмаслиги, қиш мавсумига тайёр бўлмагани сабаб боғчани қабул қилмадим. Янги боғча бўлса-да, совуқда котёллар ишламасди. Камчиликларини тузатдик, очинг дейишгач, 2023 йил 4 январдан иш бошладик. Бироқ кўп ўтмай аномал совуқ сабаб яна ёпдик. Ўша пайти ҳам котёллар ишламасди, ошхона жиҳозлари талабга жавоб бермас эди”, — дейди боғча мудираси.

“Дарё” журналисти билан суҳбатлашган манбанинг маълумот беришича, 5 миллиард 50 миллион сўмга қурилиб, 2023 йилнинг январида фойдаланишга топширилган бино 2023 йилнинг февраль ойида чўка бошлаган.

Февралда бино чўкиши сабаб боғчамиз ёпилди. Шундан сўнг таъмирлашди. Яна иш фаолиятимизни давом эттирдик. Яна шундай муаммо кузатилгач, иккинчи маротаба боғчани ёпишга мажбур бўлдик. Март ойидан яна ишладик. Май ойларида яна чўкишлар кузатилди. Буни билган туман ҳокими боғчани ёпинг, болаларни бундай хавфли жойда олиб ўтирманг, деди. Яна ёпдик. Бу сафар ҳам таъмирлагандек бўлишди. Бироқ, кўриб турганингиздек, яна деворлар ёрилиб, бино чўкишда давом этди. Бу сафар ҳам ҳали ҳеч қандай зилзила бўлмасдан туриб, девор ўпирилиб, болалар устига тушди. Қурувчи эса яна шунчаки таъмирлаш билан кифояланмоқчи бўляпти. Мен бундай бинога қандай қилиб болаларни киритаман?, — дейди боғча раҳбари.

Маълум бўлишича, мазкур бино қурувчи Сирожиддин Мирзаев раҳбарлигидаги “Олтинсой пахта сервис” МЧЖ томонидан барпо этилган. “Дарё” журналистининг бу ҳақдаги саволларига жавоб берган қурувчи Сирожиддин Мирзаев ҳолат бу даражада ваҳимали эмаслигини айтмоқда.

Йўқ, ҳолат бу даражада ваҳимали эмас. Санузел ва мудира хонасининг деворларида ёриқ пайдо бўлган. Бу бинонинг асосий девори эмас, шунчаки ички қисмдаги ҳеч қандай аҳамиятга эга бўлмаган девор ҳисобланади. Мазкур камчиликларни уч, узоғи билан тўрт кунда бартараф этиб, болалар учун тайёр ҳолатга келтириб берамиз, — дейди қурувчи Сирожиддин Мирзаев.

Қурувчи “Дарё” мухбирининг “Бино сиз айтгандек таъмирлангач, болалар учун хавфсиз масканга айланадими, эртага бирор-бир кўнгилсиз воқеа рўй бермаслиги аниқми?”, деган саволига “ҳа, ҳеч қандай муаммо кузатилмайди, бинонинг асосий деворлари мустаҳкам ва болалар учун хавфсиз”, дея жавоб берди.

“Дарё” воқеалар ривожини кузатишда давом этади.