Prezident qarori bilan qishloq xo‘jaligida fan, ta’lim va amaliyotni integratsiyalashtirish chora-tadbirlari tasdiqlandi.
Qarorga muvofiq, sentabr oyidan boshlab yangi qishloq xo‘jaligi klasterlari va kooperativlari uchun ruxsatnomalar berish shartlaridan biri oliy o‘quv yurtlari va ilmiy tashkilotlar bilan hamkorlik qilish masalalarini o‘rganish bo‘ladi. Bu innovatsiyalar va ilm-fan yutuqlarini joriy etish, shuningdek, inson kapitalini rivojlantirishni o‘z ichiga oladi.
O‘z navbatida, oliy o‘quv yurtlari Qishloq xo‘jaligi vazirligi bilan kelishilgan holda qishloq xo‘jaligi va oziq-ovqat sanoatining ustuvor muammolaridan kelib chiqqan holda dissertatsiya hamda ilmiy loyihalar mavzularini shakllantiradi. Loyihalarni amalga oshirishda mahalliy va xorij tajribasi o‘rganiladi.
Qishloq xo‘jaligi sohasida ilmiy-amaliy loyihalarni amalga oshirish, ilm-fan yutuqlarini joriy etish va tijoratlashtirishni qo‘llab-quvvatlash maqsadida maxsus jamg‘arma tashkil etilmoqda. Uning faoliyati uchun xalqaro tashkilotlardan 5 million dollar grant ajratiladi.
Shuningdek, qishloq xo‘jaligiga xizmat ko‘rsatish bo‘yicha yagona markazlarni tashkil etish bo‘yicha topshiriq belgilangan. Ular joriy qishloq xo‘jaligi markazlari va “Agrobank” fermerlar maktablari, sanoat parklari, SSP inkubatsiya markazlari, fito- va veterinariya klinikalarining xizmatlarini qamrab oladi.
Mart oxirlarida Shavkat Mirziyoyev “Agrar sektorni zamonaviy qishloq xo‘jaligi texnikalari bilan ta’minlashni rag‘batlantirishning qo‘shimcha chora-tadbirlari to‘g‘risida”gi qarorni imzolagandi. Unga ko‘ra, 2023—2024-yillarda qishloq xo‘jaligi texnikasi xaridini moliyalashtirish uchun jami 2,6 trillion so‘m yo‘naltirish rejalashtirilgan.
Izoh (0)