Rossiya urushning 500 kunida hech bir maqsadiga erisha olmadi — ISW

Rossiya Ukrainaga qarshi 500 kun davom etgan keng ko‘lamli urushda ko‘zlagan hech bir maqsadiga erisha olmadi. Amerika urushni o‘rganish instituti (ISW) tegishli hisobotni e’lon qildi.

“Besh yuz kun muqaddam Rossiya Ukrainaga qarshi asossiz urush boshladi. Rossiya harbiylari uch kun ichida Kiyevni egallash niyatida edi, biroq Ukrainadagi hech bir maqsadiga erisha olmadi”, — deydi tahlilchilar.

Ular Ukraina kuchlari tashabbusni o‘z qo‘liga olgani va front chizig‘ining katta qismi bo‘ylab qarshi hujum amaliyotlarini o‘tkazayotgani, Rossiya kuchlari esa deyarli butunlay bosib olingan hududlarni ushlab turishga uringanini ta’kidladi.

“G‘arbning yordami bilan Ukraina o‘z mustaqilligini ta’minladi, biroq uning oldida hali ham Rossiya nazorati ostida bo‘lgan strategik muhim hududni ozod qilishdek muhim vazifa turibdi”, — deyiladi hisobotda.

ISW maʼlumotlariga ko‘ra, o‘tgan kun davomida Ukraina qo‘shinlari frontning kamida uchta sektorida qarshi hujum amaliyotlarini o‘tkazgan.