Pokistonda musson yomg‘irlari sabab bo‘lgan suv toshqinlari va ko‘chkilar oqibatida kamida 50 kishi halok bo‘ldi. Halok bo‘lganlar orasida sakkiz nafar voyaga yetmaganlar ham bor.
Yozgi musson mavsumi iyundan sentabrgacha davom etadi va Janubiy Osiyodagi yillik yog‘ingarchilikning 70-80 foizini tashkil qiladi.
Yomg‘ir ikki milliard aholisi bo‘lgan mintaqada qishloq xo‘jaligi va oziq-ovqat xavfsizligi uchun juda muhim, ammo u xavfli vaziyatlarni ham keltirib chiqaradi.
Tabiiy ofatlarga qarshi kurashish milliy xizmati vakilining aytishicha, Pokistonda 25-iyundan beri yomg‘irlar sabab 50 kishi halok bo‘lgan, yana 87 kishi jarohatlangan. O‘limga olib keladigan hodisalarning aksariyati sharqiy Panjob provinsiyasida sodir bo‘lib, elektr toki urishi va binolarning qulashi bilan bog‘liq.
Pokistonning ikkinchi yirik shahri Lahorda ham rekord miqdorda yomg‘ir yog‘di. Yo‘llar daryolarga aylandi, aholining 35 foizi elektr va ichimlik suvisiz qoldi.
Meteorologiya departamenti yaqin kunlarda mamlakat bo‘ylab yanada kuchli yog‘ingarchilik bo‘lishini bashorat qildi. Mutaxassislar, shuningdek, Panjobda suv toshqini bo‘lishi mumkinligi haqida ogohlantirdi. Sohil hududi yaqinida yashovchi aholini evakuatsiya qilish allaqachon boshlangan.
Olimlarning ta’kidlashicha, iqlim o‘zgarishi natijasida mavsumiy yomg‘irlar me’yordan ko‘p yog‘moqda. 2022-yilda musson yomg‘irlari natijasida Pokiston hududining uchdan bir qismini suv bosdi va katta moddiy zarar keltirdi.
Shuningdek, tabiiy ofat oqibatida 1 700 kishi halok bo‘ldi.
Izoh (0)