Ўзбекистон ички бозорларида шакарнинг чакана нархи йил бошига нисбатан 10 фоизга пасайди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси таҳлилида келтирилган.
Қайд этилишича, республикада йиллик умумий ишлаб чиқариш қуввати 900 минг тоннадан ортиқ бўлган маҳаллий шакар ишлаб чиқарувчи (“Хоразм шакар” МЧЖ ва “Ангрен шакар” МЧЖ) корхоналарнинг ички эҳтиёжини (ўртача 650 минг тонна) 138 фоиздан ортиғини қоплаш имконияти мавжуд.
Бугунги кунда биржа савдоларида кунлик қўйилаётган 2,6 минг тонна шакар маҳсулотининг 2,1 минг тонна ёки 68 фоизи 1 килограмм учун ўртача 10 666 сўмдан реализация қилиниб, ўртача бошланғич нархга (11 001 сўм) нисбатан ўсиш 3 фоизни ташкил этмоқда.
Маҳаллий корхоналар томонидан 2023 йил январь—июнь ойларида биржа савдоларига жами 336,7 минг тонна шакар қўйилиб, 280,1 минг тоннаси (83 фоизи) сотилган.
Июнь ойида шакарнинг 1 тоннаси учун ўртача сотилиш нархи спот битимларида 11,5 миллион сўмгача (май ойида — 13,3 миллион сўм) ўртача 14 фоизга ва форвард битимларида 10,7 миллион сўмгача (май ойида — 12,5 миллион сўм) ўртача 15 фоизга пасайганлиги кузатилмоқда.
Ўз навбатида, мазкур ҳолат чакана нархларга ҳам таъсир этиб, бугунги кунда ички бозорларда шакарнинг чакана нархи 12 000—13 500 сўмгача тушганлиги кузатилмоқда ёки йил бошига (13 500—14 500 сўмни) нисбатан 10 фоизга пасайган.
“Бугунги кунда маҳаллий шакар заводлари шакар хом ашёсини Бразилия давлатидан харид қилмоқда. Хусусан, 3 июль ҳолатига мазкур заводларда 389 минг тонна шакар маҳсулоти ресурслари мавжуд ҳамда арзон нархларда хом ашё етказиб бериш бўйича узоқ муддатли шартномалар имзоланган. Шундан, омборда 3 минг тонна тайёр шакар ва 72 минг тонна хом ашё, август ойига қадар 314 минг тонна хом ашё етказиб берилади”, — дейилади хабарда.
Қўмитага кўра, шакар маҳсулоти нархларининг кескин ошиши ҳамда вужудга келиши мумкин бўлган ҳолатлар олдини олиш бўйича зарур чора-тадбирлар ишлаб чиқилган ва доимий назорат ўрнатилган.
Ўзбекистонда шакар маҳсулоти захираси
Ички бозорни шакар маҳсулоти билан узлуксиз таъминлаш мақсадида маҳаллий шакар ишлаб чиқарувчилар томонидан ишлаб чиқариш қувватларини модернизация қилиш ишлари олиб борилмоқда ва биринчи босқичида (1 майга қадар) шакар ишлаб чиқариш қувватларини ўтган йилга нисбатан 25 фоизга оширилиши, натижада суткасига 2,5 минг тоннагача шакар ишлаб чиқарилиши режалаштирилган эди. Бунда, йиллик шакар ишлаб чиқариш 600 минг тоннадан 1 миллион тоннагача ошиши кутилмоқда.
Рақобатни ривожлантириш ва истеъмолчилар ҳуқуқларини ҳимоя қилиш қўмитасига кўра, республика аҳолисини етарли миқдорда ва мақбул нархларда шакар ва ун маҳсулотлари билан таъминлаш бўйича ҳукумат томонидан зарур чоралар кўрилган.
Изоҳ (0)