Jizzax viloyati G‘allaorol tumanida tirkama avtomagistral yo‘lda haydovchisiz harakatlangani aks etgan video ijtimoiy tarmoqlarda tarqaldi. Viloyat IIB holat yuzasidan ma’lumot berdi.
Unga ko‘ra, 18-iyun kuni soat taxminan 15:30 larda Toshkent shahrida yashovchi haydovchi yuk mashinasini Jizzax viloyati G‘allaorol tumani hududidan xalqaro ahamiyatga ega M39 avtomobil yo‘lining 1010-kilometrida Samarqand—Toshkent yo‘nalishida boshqarib ketayotgan bo‘lgan. Yo‘lning dovon qismida harakatlanib ketayotib, ushbu yuk mashinasiga ulangan uzun o‘lchamli yuklarni tashishga mo‘ljallangan yarimtirkama uzilib ketgan.
Natijada ushbu yarimtirkama yo‘lning dovon qismidan pastga qarab yo‘lni ikkiga ajratib turuvchi beton to‘siqlarga sidirilib 400-500 metr masofagacha harakatlanib to‘xtagan. Surishtiruv davomida ushbu yarimtirkama yuk avtomashinasiga ulanadigan qismidan qo‘porilib ketgani maʼlum bo‘ldi.
Qayd etilishicha, ushbu hodisa natijasida hech kim tan jarohati olmagan va yo‘lovchi avtomashinalarga ham shikast yetmagan.
Izoh (0)