Жиззах вилояти Ғаллаорол туманида тиркама автомагистрал йўлда ҳайдовчисиз ҳаракатлангани акс этган видео ижтимоий тармоқларда тарқалди. Вилоят ИИБ ҳолат юзасидан маълумот берди.
Унга кўра, 18 июнь куни соат тахминан 15:30 ларда Тошкент шаҳрида яшовчи ҳайдовчи юк машинасини Жиззах вилояти Ғаллаорол тумани ҳудудидан халқаро аҳамиятга эга М39 автомобиль йўлининг 1010-километрида Самарқанд—Тошкент йўналишида бошқариб кетаётган бўлган. Йўлнинг довон қисмида ҳаракатланиб кетаётиб, ушбу юк машинасига уланган узун ўлчамли юкларни ташишга мўлжалланган яримтиркама узилиб кетган.
Натижада ушбу яримтиркама йўлнинг довон қисмидан пастга қараб йўлни иккига ажратиб турувчи бетон тўсиқларга сидирилиб 400-500 метр масофагача ҳаракатланиб тўхтаган. Суриштирув давомида ушбу яримтиркама юк автомашинасига уланадиган қисмидан қўпорилиб кетгани маълум бўлди.
Қайд этилишича, ушбу ҳодиса натижасида ҳеч ким тан жароҳати олмаган ва йўловчи автомашиналарга ҳам шикаст етмаган.
Изоҳ (0)