“Institutga kirishim uchun pora so‘rashgach, o‘qishni istamaganman” — instabloger Sevara Sultonova tasodifan vayner bo‘lgani va tadbirkorlikda omadi kulmagani haqida gapirdi (video)

“Daryo”ning YouTube’dagi kanalida instabloger Sevara Sultonova bilan suhbat tashkil etildi. Ayni kunda 900 mingdan ortiq obunachiga ega instabloger bu sohani tanlashiga nima sabab bo‘lgani va yaqinlarining bunga munosabati haqida so‘zlab berdi.

— Ochig‘ini aytsam, instabloger bo‘lishni xayolimga ham keltirmaganman. Chunki bu sohaga qiziqishim yo‘q edi. Maktabni tamomlab, Jahon tillari universitetiga hujjat topshirmoqchi bo‘lganman. Ammo shartnoma bo‘yicha o‘qishga ham balim yetmagan. Shunda bir kishi agar “qistir-qistir” qilsak shartnoma bo‘yicha o‘qishga kiritib qo‘yishini aytgan. Oilaviy sharoitimni bilganim uchun rad etganman. Undan keyin bank sohasiga ishga kirdim. Oila qurgach, turmush o‘rtog‘im ishlashimni istamadi. Ikki yil avval ovsinlarim bilan onlayn do‘kon ochgandik. Uni rivojlantirish uchun maxsus kurslarda ham o‘qidim. Ammo ishimiz uncha rivojlanmadi. Turmush o‘rtog‘im “Kel noodatiy nom tanlaymiz”, deb instagram profilimni “olifta” deb nomlagandi. Bir kuni tasodifan hazil video suratga olishni taklif qildi. Er-xotin mashinada o‘tirib video suratga oldik. Video bir kechadayoq ommalashib, minglab insonlardan ijobiy fikrlar oldim. Mana shundan keyin blogerlik faoliyatimiz boshlandi, — deydi Sevara Sultonova.

U o‘zbek blogerlarini kuzatmasligi va o‘zidagi kamchiliklarni tuzatish uchun tahsil olishi kerakligi haqida ham aytib o‘tdi.

— Turmush o‘rtog‘im IT mutaxassisi, bugungi kunda sayohat firmasini ham boshqaradi. Ammo bolalikda san’at maktabida o‘qigani uchun ham oz bo‘lsa-da, san’atga qiziqishi bor. Videolarimizdagi asosiy kamchilik shundaki, bizda aktyorlik mahorati ancha sust. Kuzatuvchilar ham bunday negativ fikrlarni ko‘p aytishadi. Mana shu kamchilikni yo‘qotish uchun aktyorlik bo‘yicha tahsil olmoqchimiz.
O‘zbek bloger va vaynerlarini umuman kuzatmayman. Nima trendda ekanligini bilish uchun bir-ikkita xorijlik blogerlarni kuzataman xolos.

Sevara Sultonova videolardagi partnyori, videolarni qanday suratga olishlari haqida so‘zlab berdi.

— “Eringiz rashk qilmaydilarmi?” deb ko‘p so‘rashadi. Nega rashk qilsinlar, men bilan o‘zlari suratga tushadilar-ku deyman. Videolarni katta qizim suratga oladi. Videolarimiz u qadar professional emas, ammo mavzular hayotiy bo‘lishiga alohida e’tibor beramiz, — deydi Sevara Sultonova.