Davron Kabulov bugungi kunda eng talabgir shoumenlardan biri hisoblanadi. Bundan tashqari, u “Million” jamoasining asoschisi va tadbirkorlik sohasida qator yutuqlarga erishgan. Ammo u ham o‘z-o‘zidan bugungi mashhurlikka erishgani va osonlikcha odamlar mehrini qozongani yo‘q.
“Bozorda meva sotardik”
Davron Kabulov Toshkent shahrida, ishchilar oilasida dunyoga kelgan. Buvisining erta o‘limi sabab uni bobosining tarbiyasiga berishgan. Boboga ermak bo‘lgan nabira bolalikdan mehnatga o‘rgangan.
— Yon qo‘shnimiz boshqa millat vakili edi. U elchixonada ishlagani uchun tomorqasiga e’tibor berolmasdi. Bobom rahmatli o‘zimiznikiga qo‘shib qo‘shnimizning bog‘iga ham olcha daraxtini ekkandi. Har yili 13 tup olcha daraxtining mevalarini terib, bozorga olib borib sotardik. Bobom “Sharq yulduzi” jurnalini o‘qishni yaxshi ko‘rardi. Tokchalaridan gazeta, kitob va jurnallar arimasdi. Barcha bolalar singari men ham sho‘x va o‘yinqaroq bo‘lganman. Baholarim faqat a’lo bo‘lmasa ham, ustozlarim bilan tez til topishib ketardim. Chunki tengdoshlarimga nisbatan fikrlarim ancha teran bo‘lgan. Albatta, bunda bobomning hissasi katta bo‘lgan, — deydi Davron Kabulov.
“Kasallik sabab futboldan ketganman”
Davron Kabulov bolalikdan futbolchi bo‘lishni orzu qilgan. Afsuski, kasallik sabab shifokor unga futbol o‘ynashni man qilgan.
— Bolaligimdan san’atkor bo‘laman, deb niyat qilmaganman. Ammo esimni taniganimdan buyon futbolchi bo‘lishni orzu qilardim. Afsuski, 14 yoshimda ko‘kyo‘tal kasalligiga chalinganman. Shifokorlar bir yilga qadar futbol o‘ynashni va yugurishni taqiqlab qo‘yishgan. Afsuski, cheklov davridan so‘ng futbolni o‘ynashga bo‘lgan ishtiyoqim ancha sustlashgan. Ammo bu sport sharhlovchisi bo‘lishimga katta hissa qo‘shgan, — deydi Davron Kabulov.
“Dadam katta qarzga botgan”
Ko‘pchilik Davron Kabulovni badavlat inson deb biladi. Ammo uning oilasi ham qiyin moliyaviy kunlarni boshidan o‘tkazgan.
— 1994-yil oilamiz uchun juda og‘ir kechgan. Buvim vafot etgan. Oradan ko‘p o‘tmay uyimizda yong‘in chiqib, bor-budimiz alanga ichida qolgan. O‘sha kunga qadar dadam tadbirkorlik bilan shug‘ullanar edi. Birdan ishlari orqaga ketib, 140 ming AQSH dollari miqdorda qarzga botgan. O‘sha paytda poytaxt markazi bo‘lgan Oybek metrosi tomondan 2-3 ming AQSH dollariga uy olsa bo‘ladigan paytlar edi. Endi qarzning qanchalik katta ekanligini tasavvur qilavering. Qarzni to‘lash kerak deb o‘zimni ko‘p narsalardan cheklardim, — deydi Davron Kabulov.
“Pul to‘lab o‘qimayman, deganman”
Davron Kabulov bilan suhbatlashgan inson uning ilmli inson ekanligini darhol payqaydi. Boshqa hamkasblaridan farqli ravishda, u kitob o‘qishni yaxshi ko‘radi. Institutga ham grant asosida o‘qishga qabul qilingan.
— O‘zbekiston Milliy universitetining jurnalistika fakultetida tahsil olganman. O‘qishga kirish uchun jiddiy tayyorgarlik ko‘rganman. Oilamning moddiy ahvolini bilganim uchun “Agar kontrakt asosida o‘qishga kirsam, o‘qimayman”, deb o‘z-o‘zimga va’da bergandim. Shuning uchun imtihonga jiddiy tayyorgarlik ko‘rganman. Tarixdan 36 ta, ona tili va adabiyoti fanidan esa 33 ta testni to‘g‘ri topganman. Ingliz tilidan ancha sust edim, 18 tagina to‘g‘ri javob topganman. U paytdagi universitetlarga kirish ballari ancha yuqori edi. “Oilamni qiyin vaziyatdan olib chiqaman”, degan qat’iy qarorim sabab eng yuqori ballni olib, talaba bo‘lganman, — deydi Davron Kabulov.
“Men Eldor Mustafoyevdan yaxshiroq sharhlayman”
Davron Kabulov tasodifan sport sharhlovchisi bo‘lgani haqida ham so‘zlab berdi.
— A’lochi talaba bo‘lmaganman, ammo o‘z fikrimni aytishni, bahslashishni yaxshi ko‘rardim. 86 ta talaba o‘tiradigan auditoriyada orqadagi o‘rindiqqa o‘tirib, qo‘shimchasiga ikki oyog‘imning tagiga ham alohida stullar qo‘yib qo‘yardim. Bir kuni ustozimiz sport jurnalistikasi haqida mavzu o‘tayotganda sharhlovchi Eldor Mustafoyev haqida gap ochgan. Tasodifan “Men futbolni undan yaxshiroq sharhlayman”, deb yuborganman. “Qani o‘rningdan tur-chi, haqiqatan futbolni yaxshi sharhlaysanmi?” degan. Ishonch bilan ha deganimdan keyin ikki kundan keyin televideniyega kelishimni tayinlagan. Keyin bilsam, u ustoz universitetdan tashqari, O‘zbekiston Milliy teleradiokompaniyasida ham ishlar ekan. Farhod Ro‘ziyev direktorning 1-o‘rinbosari bo‘lib ishlarkan, tezda yoniga sport bo‘limi muharrirlarini chaqirib, “Bu bolaga bir tekst o‘qitib ko‘ringlar”, degan. Bolalikdan sportni kuzatganim uchun ular berayotgan savollar umuman qiyinchilik tug‘dirmagan, — deydi Davron Kabulov.
“Ishga kirolmaysan, deyishgandi”
Davron Kabulov hayotida ham hammasi oson kechmagan. U radioga ishga olinmagan kunlarini kulib eslaydi.
— Universitetda o‘qiyotgan paytimda radioboshlovchilikka qiziqib qolganman. “Poytaxt” radiosiga ishga olishmagan. “Ovozing yaxshi-ku, ammo talaffuzing xato deyishgan. Hatto qo‘shimchasiga “Bu kamchilik bilan seni hech qayerga ishga olishmaydi”, deb yupatib ham qo‘yishgan. Sport xabarlari redaksiyasiga ishga kirganimdan keyin diktorlar o‘qigan qog‘ozlarni uyga olib kelib, har kuni kechqurun matnlarni o‘qishni mashq qilardim, — deydi Davron Kabulov.
“Efirdan chetlatib, jazolashgan”
Davron Kabulov avvaldan cho‘rtkesar bo‘lgani, jonli efirda o‘ylamay gapirib yuborganlari uchun efirdan chetlatilgani haqida gapirib berdi.
— Futbolni bor-yo‘g‘i 3 marta sharhlash baxtiga musharraf bo‘lganman. Oxirgi jonli efirda qovun tushirganimdan keyin meni 3 oyga efirdan chetlatishgan. 2006-yildan to 2012-yilga qadar televideniyeda ishladim. “Million” jamoasi tashkil etilganidan keyin bor e’tiborimni unga qaratishga qaror qilganman. Chunki televideniyedagi “aytish mumkin emas” gaplarni aytmasligimga javob berolmasdim, — deydi Davron Kabulov.
“Yevropani eslatuvchi mehmonxona qurdim”
Davron Kabulov “Million” jamoasidagi faoliyatidan tashqari tadbirkorlik bilan ham shug‘ullanadi. U erkaklar kiyim brendini yo‘lga qo‘ygan.
— Yetti yil davomida hech qanday kredit va moliyaviy yordamsiz mehmonxona qurdik. Bu yil mehmonxona ishga tushadi. Yevropa mehmonlarini eslatadigan mehmonxona Toshkentda turizm salohiyatini oshirishga o‘z hissasini qo‘shadi, degan umiddaman, — deydi Davron Kabulov.
Davron Kabulov oilali, ikki qizaloqning otasi hisoblanadi.
Izoh (0)