“Дарё”нинг YouTube’даги каналида инстаблогер Севара Султонова билан суҳбат ташкил этилди. Айни кунда 900 мингдан ортиқ обуначига эга инстаблогер бу соҳани танлашига нима сабаб бўлгани ва яқинларининг бунга муносабати ҳақида сўзлаб берди.
— Очиғини айтсам, инстаблогер бўлишни хаёлимга ҳам келтирмаганман. Чунки бу соҳага қизиқишим йўқ эди. Мактабни тамомлаб, Жаҳон тиллари университетига ҳужжат топширмоқчи бўлганман. Аммо шартнома бўйича ўқишга ҳам балим етмаган. Шунда бир киши агар “қистир-қистир” қилсак шартнома бўйича ўқишга киритиб қўйишини айтган. Оилавий шароитимни билганим учун рад этганман. Ундан кейин банк соҳасига ишга кирдим. Оила қургач, турмуш ўртоғим ишлашимни истамади. Икки йил аввал овсинларим билан онлайн дўкон очгандик. Уни ривожлантириш учун махсус курсларда ҳам ўқидим. Аммо ишимиз унча ривожланмади. Турмуш ўртоғим “Кел ноодатий ном танлаймиз”, деб инстаграм профилимни “олифта” деб номлаганди. Бир куни тасодифан ҳазил видео суратга олишни таклиф қилди. Эр-хотин машинада ўтириб видео суратга олдик. Видео бир кечадаёқ оммалашиб, минглаб инсонлардан ижобий фикрлар олдим. Мана шундан кейин блогерлик фаолиятимиз бошланди, — дейди Севара Султонова.
У ўзбек блогерларини кузатмаслиги ва ўзидаги камчиликларни тузатиш учун таҳсил олиши кераклиги ҳақида ҳам айтиб ўтди.
— Турмуш ўртоғим IT мутахассиси, бугунги кунда саёҳат фирмасини ҳам бошқаради. Аммо болаликда санъат мактабида ўқигани учун ҳам оз бўлса-да, санъатга қизиқиши бор. Видеоларимиздаги асосий камчилик шундаки, бизда актёрлик маҳорати анча суст. Кузатувчилар ҳам бундай негатив фикрларни кўп айтишади. Мана шу камчиликни йўқотиш учун актёрлик бўйича таҳсил олмоқчимиз.
Ўзбек блогер ва вайнерларини умуман кузатмайман. Нима трендда эканлигини билиш учун бир-иккита хорижлик блогерларни кузатаман холос.
Севара Султонова видеолардаги партнёри, видеоларни қандай суратга олишлари ҳақида сўзлаб берди.
— “Эрингиз рашк қилмайдиларми?” деб кўп сўрашади. Нега рашк қилсинлар, мен билан ўзлари суратга тушадилар-ку дейман. Видеоларни катта қизим суратга олади. Видеоларимиз у қадар профессионал эмас, аммо мавзулар ҳаётий бўлишига алоҳида эътибор берамиз, — дейди Севара Султонова.
Изоҳ (0)