Xalqaro Olimpiya qo‘mitasining (XOQ) navbatdagi sessiyasi 22-iyun, payshanba kuni bo‘lib o‘tdi.
Qo‘mita Xalqaro boks assotsiatsiyasini (IBA) 2024-yil Parijda bo‘lib o‘tadigan Olimpiya o‘yinlarida boks janglarini tashkil etish huquqidan mahrum qildi.
XOQning 2-iyundagi hisobotiga ko‘ra, IBA 2021-yilning dekabrida maqomni to‘xtatishni bekor qilish bo‘yicha qo‘yilgan shartlarni bajarmagan.
Bunga javoban IBA ham bayonot bilan chiqdi: “Bugun, 2023-yilning 22-iyun sanasida XOQ IBA’ni tan olmasdan katta xatoga yo‘l qo‘ydi va o‘zining siyosiy mohiyatini oshkor etdi. Shunisi e’tiborga loyiqki, bundan 82 yil muqaddam, aynan shu kunda, fashistlar Germaniyasi Sovet Ittifoqi hududida tinch aholiga hujum qilib, urushning avj olishiga va insoniyatning fojiasiga sabab bo‘lgandi. Bugungi qaror ham jahon boksi uchun halokatli bo‘lganini yashirmaymiz. Shuningdek, bu XOQning boks va sportchilar manfaatlarini ko‘zlab, ish tutayotgani haqidagi bayonotlarga zid kelishi aniq”.
2019-yilda ham XOQ IBA’ni Olimpiya o‘yinlari boks musobaqalarini o‘tkazish huquqidan mahrum qilgan va o‘z nazorati ostida o‘tkazgandi. O‘shanda bunga sabab sifatida boshqaruv, moliya, hakamlik va etnik muammolar ko‘rsatilgandi.
2023-yilning aprel oyida AQSH va Buyuk Britaniya IBA a’zoligidan chiqqan hamda World Boxing federatsiyasiga asos solgandi. Qayd etilishicha, ushbu yangi tashkilot yaqin kelajakda IBA’ning boksdagi o‘rnini egallashga urinmoqda.
Eslatib o‘tamiz, rossiyalik Umar Kremlyov 2020-yilning dekabridan buyon IBA’ni boshqarib kelmoqda. Bungacha u Rossiya boks federatsiyasi bosh kotibi lavozimida ishlagan. U lavozimga tayinlangan paytda IBA’ning qarzlari 20 million dollarni tashkil qilgan. 2021-yilning may oyida Kreml barcha qarzlarning to‘liq qaytarilishini e’lon qilgan. 2022-yilda Kremlyov IBA prezidentligiga qayta saylandi.
Izoh (0)