Ўзбекистон аҳолиси янада сифатли телекоммуникация хизматлари билан таъминланишига хизмат қилувчи қонун қабул қилинди

Сенатнинг қирқ иккинчи ялпи мажлисида “Радиочастота спектри тўғрисида”ги қонун маъқулланди, деб хабар бермоқда юқори палата матбуот хизмати.

Мажлисда қайд этилишича, радиочастота спектридан фойдаланувчиларнинг ўз радиочастота спектридан фойдаланиш ҳуқуқини бошқа шахсга беришига нисбатан мавжуд тақиқ радиочастота спектридан янада самарали фойдаланиш имкониятларини чекламоқда. Бу эса ўз навбатида телекоммуникациялар тармоқларининг ривожланишига тўсиқ бўлмоқда. Бундан ташқари, ахборот хавфсизлиги таъминланишини янада кучайтириш мақсадида, шунингдек, амалга оширилаётган маъмурий ислоҳотларни инобатга олиб мазкур қонунга тегишли ўзгартишлар киритиш зарурияти юзага келмоқда.

Шу муносабат билан ушбу қонун билан радиочастота спектридан фойдаланувчиларга ўзларига бириктирилган радиочастота спектридан бошқа фойдаланувчилар билан биргаликда фойдаланиш ҳуқуқи берилишини ва ундан фойдаланиш тартиби белгиланишини назарда тутувчи ўзгартишлар киритилмоқда.

Шунингдек, радиоэлектрон воситалардан фойдаланиш жараёнини соддалаштириш мақсадида лойиҳалаш бўйича рухсатнома олиш тартиби бекор қилинмоқда. Сенаторларнинг таъкидлашича, қонунга киритилаётган бу каби ўзгаришлар радиочастота спектри фойдаланувчилари фаолиятида жуда муҳим ҳисобланиб, алоқа хизматларининг сифатини ошириш учун муҳим омилдир.

Сенаторларнинг фикрича, ушбу қонуннинг қабул қилиниши радиочастота спектридан янада самарали фойдаланилишига, телекоммуникация тармоқларининг ривожланишига, шунингдек, аҳолининг янада сифатли телекоммуникация хизматлари билан таъминланишига хизмат қилади.