Эроннинг дунёга машҳур CinnaGen компанияси саратонни даволашда фойдаланиладиган дориларни Ўзбекистонда ишлаб чиқармоқчи. Бу ҳақда Тошкентдаги Эрон инновациялар ва технологиялар уйи (IHITT) бош директори Расул Беҳештифар “Дарё” мухбирига берган интервьюсида маълум қилди.
Бугун, 18 июнь куни Тошкентдаги Эрон инновациялар ва технологиялар уйининг очилиш маросими бўлиб ўтди. Тадбирда янги марказнинг муҳим жиҳатлари тўғрисида фикр билдирилди.
Расул Беҳештифарнинг айтишича, IHITT Эрон ва Ўзбекистон ўртасидаги технологик алмашинувни амалга ошириш, ҳамкорлик ва шерикликни ривожлантириш билан шуғулланади.
“Бу марказни ташкил этиш орқали Ўзбекистонда ишлаб чиқарилган янги технологияларни Эронга, у ердагиларини мазкур мамлакатга жорий этишни мақсад қилганмиз. Шу билан бирга, илм-фан ва инновацион марказлар ҳамкорлигини ривожлантириш, университет ҳамда институтлар талабаларини янги технологиялар билан таништиришни режалаштирганмиз. Дастлабки босқичда энергетика, тиббиёт, қишлоқ хўжалиги ва ахборот технологиялари йўналишларида иш олиб борамиз. Ҳозиргача ушбу соҳаларда 30 дан ортиқ компаниялар билан битимлар тузишга улгурдик ва улар яқин кунларда Ўзбекистонга келиб, ўзларининг инновацион лойиҳалари билан қатнашади. Кейинги босқичда банк, нефть-газ, кон соҳаларида ўз ишларимизни амалга оширмоқчимиз”, — деди у.
Расул Беҳештифарнинг қўшимча қилишича, Эроннинг дори-дармон ишлаб чиқарувчи CinnaGen компанияси Ўзбекистон билан ҳамкорлик қилиши кутилмоқда.
“Ўзбекистон делегацияси Эронга ташрифи давомида CinnaGen холдингида бўлади ва компания фаолияти билан танишади. Бугунги кунда компания 300 дан ортиқ турдаги дори маҳсулотларини ишлаб чиқаради. Хусусан, саратон касаллигини даволашда қўлланиладиган 7-8 турдаги дорилар ҳам айнан ўша компанияда ишлаб чиқарилади. Айтиш керакки, ҳозирда саратон касаллигини даволовчи дори маҳсулотларини дунёда фақатгина иккита компания ишлаб чиқаради. Улардан бири — CinnaGen’дир. Шунинг учун ҳам бу Ўзбекистонга жуда қизиқ. Бизнинг асосий мақсадимиз мазкур турдаги дориларни Ўзбекистонга нафақат экспорт қилиш, балки Ўзбекистоннинг ўзида ҳам ишлаб чиқаришдан иборат”, — деди бош директори.
Изоҳ (0)