Kvotalar OTMlarga qabul boshlanguncha eʼlon qilinadi — Oliy taʼlim, fan va innovatsiyalar vazirligi

O‘zbekistonda 20-iyundan oliy taʼlim muassasalariga hujjat topshirish jarayonlari boshlanishi kutilmoqda. Biroq hali kvotalar eʼlon qilinmadi.

Qoidaga ko‘ra, prezident qarori bilan davlat buyurtmasi parametrlari tasdiqlangandan keyin Davlat qabul komissiyasi kvotani qayta taqsimlashi kerak bo‘ladi. OTMlarga hujjat topshirish boshlanishiga 4 kun qoldi, ammo kvotalar hali eʼlon qilinmadi.

Oliy taʼlim, fan va innovatsiyalar vazirligining “Daryo”ga maʼlum qilishicha, kvotalar qabul boshlanguncha (20-iyungacha) eʼlon qilinadi.

Eslatib o‘tamiz, 2022-yilda OTMlarga qabul kvotalari 15-iyunda tasdiqlangandi. Natijada hujjat qabul qilish jarayonlari odatiy 15-iyundan emas, 20-iyundan boshlanadigan bo‘lgan. 2021-yilda kvotalar 22-iyunda tasdiqlangan va shu kundan qabul boshlangan.

Maʼlumot uchun, 2022-yil 15-iyundagi prezident qaroriga asosan, 2023/2024 o‘quv yilidan boshlab davlat OTMlariga o‘qishga qabul qilishning davlat buyurtmasi parametrlari faqat davlat granti bo‘yicha tasdiqlanadi. Qarorda shuningdek, davlat OTMlariga (moliyaviy mustaqillik berilgan OTMlari bundan mustasno) to‘lov-kontrakt asosidagi qabul parametrlari har yili 20-iyunga qadar Oliy taʼlim, fan va innovatsiyalar vazirligining rasmiy veb-saytida eʼlon qilinishi belgilangan.