Markaziy bank boshqaruvining 15-iyun kuni bo‘lib o‘tgan yig‘ilishida asosiy stavkani yillik 14 foiz darajasida o‘zgarishsiz qoldirish to‘g‘risida qaror qabul qilindi.
Markaziy bank axborotida qayd etilishicha, iqtisodiyotda inflyatsiyaning fundamental va mavsumiy omillar ta’sirida sekinlashish dinamikasi davom etmoqda. Yil oxirigacha joriy tendensiyalar saqlanib qolinishi bilan birgalikda inflyatsiyani keskin oshiruvchi xatarlarning vujudga kelish ehtimollari kamayib bormoqda. Bazaviy inflyatsiya va inflyatsion kutilmalarning barqaror pasayish trayektoriyasiga o‘tishi, kelgusida ham iqtisodiyotda nisbatan qat’iy pul-kredit sharoitlarini saqlab qolgan holda asosiy stavkani pasaytirish imkoniyatlarini kuchaytiradi.
2023-yil may oyida umumiy inflyatsiya yillik hisobda 10,4 foizgacha sekinlashdi. Bunda, bazaviy inflyatsiya sekinroq pasayib 12,4 foizni tashkil etdi. Keng qamrovli inflyatsion jarayonlarning yumshab borayotgani iste’mol savatidagi narxi 10 foizdan yuqori bo‘lgan tovar va xizmatlar ulushini 50 foizgacha kamayishiga imkon berdi. Biroq, ushbu ko‘rsatkich 2020—2021-yillardagi 30-40 foizdan yuqori darajada shakllangan.
O‘tgan yilgi yuqori baza ta’sirlarini tugab borishi, mavsumiy omillar va tartibga solinadigan narxlarning deyarli o‘zgarishsiz saqlanganligi hamda milliy valyuta almashuv kursining nisbatan barqaror darajada bo‘lganligi inflyatsiyaning pasayishiga xizmat qilgan asosiy omillardan bo‘lmoqda.
Ayni paytda, inflyatsiyaning uzoq muddatli komponentlarida barqaror pasayish tendensiyasi sekin shakllanmoqda. Keyingi 12 oy uchun aholining inflyatsion kutilmalarini pasayuvchi trendi davom etib, may oyida 13,7 foizni tashkil etdi. Ichki iqtisodiy sharoitlarning barqarorlashib borayotgani tadbirkorlar inflyatsion kutilmalarining 13,5 foizgacha pasayishida o‘z aksini topdi.
Kelgusi davrlarda bazaviy inflyatsiya va inflyatsion kutilmalarning barqaror pasayish trayektoriyasiga o‘tishi, iqtisodiyotda nisbatan qat’iy pul-kredit sharoitlarini saqlab qolgan holda, asosiy stavkani pasaytirish imkoniyatlarini yuzaga keltirishi mumkin.
Markaziy bank boshqaruvining 2023-yil 26-yanvarda bo‘lib o‘tgan yig‘ilishida asosiy stavka yillik 15 foiz darajasida o‘zgarishsiz qoldirilgandi. 2023-yil 16-martda asosiy stavkani yillik 1 foiz bandga pasaytirib, yillik 14 foiz darajasida belgilandi. 4-may kuni asosiy stavka 14 foiz darajasida o‘zgarishsiz qoldirilgandi.
Izoh (0)