Ўзбекистонда асосий ставка яна 14 фоиз даражасида ўзгаришсиз қолдирилди

Марказий банк бошқарувининг 15 июнь куни бўлиб ўтган йиғилишида асосий ставкани йиллик 14 фоиз даражасида ўзгаришсиз қолдириш тўғрисида қарор қабул қилинди.

Марказий банк ахборотида қайд этилишича, иқтисодиётда инфляциянинг фундаментал ва мавсумий омиллар таъсирида секинлашиш динамикаси давом этмоқда. Йил охиригача жорий тенденциялар сақланиб қолиниши билан биргаликда инфляцияни кескин оширувчи хатарларнинг вужудга келиш эҳтимоллари камайиб бормоқда. Базавий инфляция ва инфляцион кутилмаларнинг барқарор пасайиш траекториясига ўтиши, келгусида ҳам иқтисодиётда нисбатан қатъий пул-кредит шароитларини сақлаб қолган ҳолда асосий ставкани пасайтириш имкониятларини кучайтиради.

2023 йил май ойида умумий инфляция йиллик ҳисобда 10,4 фоизгача секинлашди. Бунда, базавий инфляция секинроқ пасайиб 12,4 фоизни ташкил этди. Кенг қамровли инфляцион жараёнларнинг юмшаб бораётгани истеъмол саватидаги нархи 10 фоиздан юқори бўлган товар ва хизматлар улушини 50 фоизгача камайишига имкон берди. Бироқ, ушбу кўрсаткич 2020—2021 йиллардаги 30-40 фоиздан юқори даражада шаклланган.

Ўтган йилги юқори база таъсирларини тугаб бориши, мавсумий омиллар ва тартибга солинадиган нархларнинг деярли ўзгаришсиз сақланганлиги ҳамда миллий валюта алмашув курсининг нисбатан барқарор даражада бўлганлиги инфляциянинг пасайишига хизмат қилган асосий омиллардан бўлмоқда.

Айни пайтда, инфляциянинг узоқ муддатли компонентларида барқарор пасайиш тенденцияси секин шаклланмоқда. Кейинги 12 ой учун аҳолининг инфляцион кутилмаларини пасаювчи тренди давом этиб, май ойида 13,7 фоизни ташкил этди. Ички иқтисодий шароитларнинг барқарорлашиб бораётгани тадбиркорлар инфляцион кутилмаларининг 13,5 фоизгача пасайишида ўз аксини топди.

Келгуси даврларда базавий инфляция ва инфляцион кутилмаларнинг барқарор пасайиш траекториясига ўтиши, иқтисодиётда нисбатан қатъий пул-кредит шароитларини сақлаб қолган ҳолда, асосий ставкани пасайтириш имкониятларини юзага келтириши мумкин.

Марказий банк бошқарувининг 2023 йил 26 январда бўлиб ўтган йиғилишида асосий ставка йиллик 15 фоиз даражасида ўзгаришсиз қолдирилганди. 2023 йил 16 мартда асосий ставкани йиллик 1 фоиз бандга пасайтириб, йиллик 14 фоиз даражасида белгиланди. 4 май куни асосий ставка 14 фоиз даражасида ўзгаришсиз қолдирилганди.