Buxoro shahrida fohishaxona tashkil qilish bilan bog‘liq bir nechta jinoiy holatlarga chek qo‘yildi. Bu haqda viloyat Ichki ishlar boshqarmasi axborot xizmati xabar berdi.
Qayd etilishicha, Buxoro shahri “Piridastgir” mahallasida yashovchi, 1967-yilda tug‘ilgan M.Z. ismli ayol o‘zi ishlab kelayotgan uy mehmonxonasida fuqarolar Q.O‘. va Q.I.ning jinsiy aloqada bo‘lishi uchun alohida xona ajratib, shart-sharoit yaratib berib, buning evaziga 200 ming so‘m miqdoridagi pullarni olib, g‘arazli va boshqa past niyatlarda fohishaxona tashkil qilgan.
Ikkinchi holatda esa Buxoro tumani “Q.Mahmud” mahallasida ro‘yxatda turuvchi, 1992-yilda tug‘ilgan Sh.Z. ismli ayol o‘zi istiqomat qiladigan Buxoro shahar Turdi Farog‘iy ko‘chasida joylashgan ko‘p qavatli uylardan biridagi xonadonida g‘arazli va past niyatlarda, moddiy manfaatdor bo‘lish maqsadida Y.R.ning P.A. bilan jinsiy aloqa qilishi uchun alohida xona ajratib berib, buning evaziga 100 ming so‘m olib, fohishaxona tashkil etgan.
Navbatdagi xuddi shunday holatda Navoiy viloyati Qiziltepa tumanida ro‘yxatda turib, Buxoro shahri Turdi Farog‘iy ko‘chasida joylashgan ko‘p qavatli uylardan biridagi xonadonda vaqtinchalik yashab kelayotgan, 1980-yilda tug‘ilgan O.D. ismli ayol fuqarolar R.D. va Q.F.ning jinsiy aloqada bo‘lishlari uchun alohida xona ajratib, shart-sharoit yaratib berib, buning evaziga 200 ming so‘m miqdoridagi naqd pulni olib, fohishaxona tashkil qilgan.
Shuningdek, Shofirkon tumani “Quyi Chuqurak” mahallasida ro‘yxatda turib, Buxoro shahri Islom Karimov ko‘chasida joylashgan ko‘p qavatli uylardan biridagi xonadonda ijarada yashab kelayotgan, 1997-yilda tug‘ilgan H.D. ismli ayol g‘arazli va past niyatlarda, moddiy manfaatdor bo‘lish maqsadida S.M. va R.M.ni qo‘shmachilik yo‘li bilan topib berib, ularning jinsiy aloqa qilishlari uchun joy ajratib berib, 400 ming so‘m olib, fohishaxona tashkil qilgani aniqlangan.
Yuqoridagi holatlar yuzasidan Jinoyat kodeksining 131-moddasi tegishli bandlari bilan jinoyat ishi qo‘zg‘atilib, dastlabki tergov harakatlari olib borilmoqda. Bu kabi jinoiy holatlarning oldini olish va sodir etilishi mumkin bo‘lgan jinoyatlarni fosh etish borasidagi tezkor hamda profilaktik tadbirlar davom ettirilmoqda.