Rossiya o‘z yadro qurolini Belarusda joylashtirish rejalarini amalga oshirmoqda. 25-may kuni ikki davlat mudofaa vazirlari Sergey Shoygu va Viktor Xrenin Minskda “Rossiyaning nostrategik yadro qurolini Belarus Respublikasi hududidagi maxsus omborda saqlash tartibini belgilovchi hujjatlar”ni imzoladi. Bu haqda Belarus Mudofaa vazirligi matbuot xizmati xabar berdi.
Shoyguning so‘zlariga ko‘ra, Rossiya va Belarus tomonidan amalga oshirilayotgan chora-tadbirlar “barcha mavjud xalqaro-huquqiy majburiyatlarga mos keladi”. Uning ta’kidlashicha, Rossiya Belarusda taktik yadro qurollarini joylashtirsa-da, ularni Minsk ixtiyoriga topshirmaydi, yadroviy qurollar ustidan nazorat va ulardan foydalanish bo‘yicha qaror Moskvada qoladi.
O‘z navbatida, Xrenin Rossiyaning Belarusda taktik yadro quroli joylashtirishini “do‘st bo‘lmagan mamlakatlarning agressiv siyosatiga javob” deb atadi va bu “mintaqadagi vaziyatning yanada keskinlashishiga yo‘l qo‘yilmasligini” eslatib turishini aytdi. Bundan tashqari, vazirlar o‘z idoralari o‘rtasidagi harbiy-siyosiy vaziyat va harbiy-texnik hamkorlik masalalarini muhokama qilgan.
Taktik yadro qurolini saqlash uchun ombor qurilmoqda
25-mart kuni Vladimir Putin Minskning so‘roviga binoan Rossiya o‘zining taktik yadro qurolini Belarusda joylashtirmoqchiligi haqida maʼlum qildi va AQSH uzoq yillardan beri ittifoqdosh davlatlar hududida xuddi shunday yo‘l tutib kelayotganini taʼkidladi. Belarusda yadro qurolini saqlash uchun ombor qurilishi 1-iyulga qadar yakunlanishi rejalashtirilgan.
Moskva Minskka yadroviy qurol tashishga qodir “Iskandar” raketa tizimini ham topshirgan va Belarus samolyotlarini maxsus o‘q-dorilardan foydalanish uchun qayta jihozlashda yordam bergan. Shuningdek, Belarus harbiy xizmatchilari Rossiyada tegishli tayyorgarlikdan o‘tkazilgan.
Izoh (0)