Россия ўз ядро қуролини Беларусда жойлаштириш режаларини амалга оширмоқда. 25 май куни икки давлат мудофаа вазирлари Сергей Шойгу ва Виктор Хренин Минскда “Россиянинг ностратегик ядро қуролини Беларусь Республикаси ҳудудидаги махсус омборда сақлаш тартибини белгиловчи ҳужжатлар”ни имзолади. Бу ҳақда Беларусь Мудофаа вазирлиги матбуот хизмати хабар берди.
Шойгунинг сўзларига кўра, Россия ва Беларусь томонидан амалга оширилаётган чора-тадбирлар “барча мавжуд халқаро-ҳуқуқий мажбуриятларга мос келади”. Унинг таъкидлашича, Россия Беларусда тактик ядро қуролларини жойлаштирса-да, уларни Минск ихтиёрига топширмайди, ядровий қуроллар устидан назорат ва улардан фойдаланиш бўйича қарор Москвада қолади.
Ўз навбатида, Хренин Россиянинг Беларусда тактик ядро қуроли жойлаштиришини “дўст бўлмаган мамлакатларнинг агрессив сиёсатига жавоб” деб атади ва бу “минтақадаги вазиятнинг янада кескинлашишига йўл қўйилмаслигини” эслатиб туришини айтди. Бундан ташқари, вазирлар ўз идоралари ўртасидаги ҳарбий-сиёсий вазият ва ҳарбий-техник ҳамкорлик масалаларини муҳокама қилган.
Тактик ядро қуролини сақлаш учун омбор қурилмоқда
25 март куни Владимир Путин Минскнинг сўровига биноан Россия ўзининг тактик ядро қуролини Беларусда жойлаштирмоқчилиги ҳақида маълум қилди ва АҚШ узоқ йиллардан бери иттифоқдош давлатлар ҳудудида худди шундай йўл тутиб келаётганини таъкидлади. Беларусда ядро қуролини сақлаш учун омбор қурилиши 1 июлга қадар якунланиши режалаштирилган.
Москва Минскка ядровий қурол ташишга қодир “Искандар” ракета тизимини ҳам топширган ва Беларусь самолётларини махсус ўқ-дорилардан фойдаланиш учун қайта жиҳозлашда ёрдам берган. Шунингдек, Беларусь ҳарбий хизматчилари Россияда тегишли тайёргарликдан ўтказилган.
Изоҳ (0)