Qashqadaryo viloyatining Chiroqchi tumanida aholiga borayotgan toza ichimlik suvi quvuri teshilib, isteʼmolga yaroqli suv 321 metr uzoqlikdagi baliq ko‘liga oqizib qo‘yilgani aniqlandi. Bu haqda “Daryo”ga “Qashqadaryo suv taʼminoti” MCHJ axborot xizmati rahbari Ixtiyor Umarov maʼlum qildi.
Qayd etilishicha, ushbu holat “Qashqadaryo suv taʼminoti” MCHJ Shahrisabz—Qarshi suv ishlab chiqarish filiali ishchi guruhi reydida aniqlangan.
“Tadbirda mazkur bosh suv quvurning ‘Qahramon’ mahallasidan o‘tgan qismida A.A. ismli shaxs tomonidan baliqchilik fermer xo‘jaligi tashkil etilgani, baliq ko‘liga diametri 76 mm bo‘lgan quvur orqali noqonuniy ravishda ulanib, toza ichimlik suvi baliq ko‘li havzasiga oqizib qo‘yilgani maʼlum bo‘ldi. Holat yuzasidan tegishli dalolatnoma tuzilib, noqonuniy ulanma bosh suv quvuridan uzilgan hamda qonunbuzarga nisbatan chora ko‘rish uchun Ichimlik suvidan foydalanishni nazorat qilish viloyat hududiy inspeksiyasiga taqdim etilgan”, — deydi Ixtiyor Umarov.
.jpg)
Qo‘shimcha qilinishicha, 2022-yilda viloyatda ichimlik suvi quvuriga 100 dan ortiq noqonuniy ulanishlar bo‘lgani aniqlanib, shundan 16 ta holatda jinoiy ish qo‘zg‘atilgan. Ikki holatda qamoqqa olish ehtiyot chorasi qo‘llanilgan.
Izoh (0)