Qashqadaryo viloyatining G‘uzor tumanida 105 km/soat tezlikda harakatlangan Malibu radarga tushdi. Jarimasi esa Damas’ga yozildi. Bu haqda avtobloger Maqsud Muzaffarov maʼlum qildi.
Maʼlum bo‘lishicha, mazkur qoidabuzarlik 2023-yilning 6-may kuni viloyatning G‘uzor tumanida sodir etilgan bo‘lib, holat YPX inspektori Saidislombek Shodixonov tomonidan rasmiylashtirilgan.
Blogerning yozishicha, mazkur voqea jamoatchilikka oshkor etilgach, Malibu haydovchisi aybini tan olib, viloyat Yo‘l harakati xavfsizligi boshqarmasiga borgan.
“Postimizdan so‘ng Malibu haydovchisi bu yerda uning aybi borligini aytib, Damas avtomobilining davlat raqamini Malibu avtomobiliga taqib, harakatlanganini tan olibdi. Va viloyat ‘GAI’ga bu haqda maʼlumot berib, aybini tan olgan holda bugun viloyat Yo‘l harakati xavfsizligi boshqarmasiga borayotgan ekan”, — deydi bloger bu haqda.
Maqsud Muzaffarov haydovchining aybini tan olganini olqishlab, YPX inspektori Damas va Malibu’ni bir-biridan ajratolmaydimi deya savol bergan.
“Malibu haydovchisining aybini tan olishi, mardlik qilgani mayli, ammo shu hujjatni rasmiylashtirayotgan ‘GAI’ rasmdagi Damas mashinasi emas, Malibu ekaniga aqli yetmadimi?”, — deydi bloger.
Izoh (0)