Munojot Yo‘lchiyevadan Alisher Fayzgacha: Farg‘onada yulduzlar ishtirokida o‘tkazilgan “Onalarga ehtirom” festivali — suratlarda

Farg‘onada “Onalarga ehtirom” festivali o‘tkazildi. Bu haqda “Daryo” muxbiri Azizjon Ermatov xabar berdi.

Marg‘ilon shahridagi “Ijodkorlar bog‘i”da bo‘lib o‘tgan festival g‘oliblarini tantanali taqdirlash marosimida viloyatning barcha shahar va tumanlaridan kelgan ming nafardan ziyod mo‘tabar onaxonlar hamda ayollar ishtirok etgan.

Qayd etilishicha, tadbirda Farg‘ona viloyati hokimi Xayrulla Bozorov, madaniyat vaziri Ozodbek Nazarbekov qatnashib, farg‘onalik onalarga ehtirom ko‘rsatgan.

Viloyatdagi shahar-tumanlar vakillari tomonidan har bir hududning o‘ziga xos jihatlari, onalarga bo‘lgan hurmat-ehtiromni ifoda etgan turli ko‘rgazmalar, badiiy chiqishlar va madaniy-ma’rifiy tadbirlar namoyish etilgan.
Festivalda milliy va zamonaviy liboslar ko‘rgazmasi, “Onalarga bag‘ishlangan eng yaxshi qo‘shiq”, “Onalarga bag‘ishlangan eng yaxshi videorolik va dil izhorlari” hamda “Alla” tanlovlari, taniqli san’atkorlar va folklor jamoalari ishtirokida konsert dasturlari o‘tkazilgan.

Festival doirasida “Eng matonatli ona”, “Eng yaxshi mutaxassislarni tarbiyalagan ona”, “Eng ibratli mehnatkash ona”, “Eng yaxshi tadbirkorlar onasi”, “Eng yaxshi olima ona” kabi 12 ta nominatsiya bo‘yicha g‘olib bo‘lgan onalarga maxsus mukofotlar topshirilgan. Qariyb bir oy davomida viloyatning barcha shahar-tumanlarida o‘tkazilgan festival tadbirlarida 10 ming nafardan ziyod farg‘onalik onalarga ehtirom ko‘rsatilgan.

Munojot Yo‘lchiyeva, Abduhoshim Ismoilov, Ilhom Ibrohimov, Zulayho Boyxonova, Alisher Fayz, Abdujalil Qo‘qonov, Muhsinbek Mo‘minov, Ziyoda kabi taniqli san’atkorlar ishtirokida konsert dasturi taqdim etildi. Festival bayramona mushakbozlik bilan yakunlandi.