Муножот Йўлчиевадан Алишер Файзгача: Фарғонада юлдузлар иштирокида ўтказилган “Оналарга эҳтиром” фестивали — суратларда

Фарғонада “Оналарга эҳтиром” фестивали ўтказилди. Бу ҳақда “Дарё” мухбири Азизжон Эрматов хабар берди.

Марғилон шаҳридаги “Ижодкорлар боғи”да бўлиб ўтган фестиваль ғолибларини тантанали тақдирлаш маросимида вилоятнинг барча шаҳар ва туманларидан келган минг нафардан зиёд мўтабар онахонлар ҳамда аёллар иштирок этган.

Қайд этилишича, тадбирда Фарғона вилояти ҳокими Хайрулла Бозоров, маданият вазири Озодбек Назарбеков қатнашиб, фарғоналик оналарга эҳтиром кўрсатган.

Вилоятдаги шаҳар-туманлар вакиллари томонидан ҳар бир ҳудуднинг ўзига хос жиҳатлари, оналарга бўлган ҳурмат-эҳтиромни ифода этган турли кўргазмалар, бадиий чиқишлар ва маданий-маърифий тадбирлар намойиш этилган.

Фестивалда миллий ва замонавий либослар кўргазмаси, “Оналарга бағишланган энг яхши қўшиқ”, “Оналарга бағишланган энг яхши видеоролик ва дил изҳорлари” ҳамда “Алла” танловлари, таниқли санъаткорлар ва фолклор жамоалари иштирокида концерт дастурлари ўтказилган.

Фестиваль доирасида “Энг матонатли она”, “Энг яхши мутахассисларни тарбиялаган она”, “Энг ибратли меҳнаткаш она”, “Энг яхши тадбиркорлар онаси”, “Энг яхши олима она” каби 12 та номинация бўйича ғолиб бўлган оналарга махсус мукофотлар топширилган. Қарийб бир ой давомида вилоятнинг барча шаҳар-туманларида ўтказилган фестиваль тадбирларида 10 минг нафардан зиёд фарғоналик оналарга эҳтиром кўрсатилган.

Муножот Йўлчиева, Абдуҳошим Исмоилов, Илҳом Иброҳимов, Зулайҳо Бойхонова, Алишер Файз, Абдужалил Қўқонов, Муҳсинбек Мўминов, Зиёда каби таниқли санъаткорлар иштирокида концерт дастури тақдим этилди. Фестиваль байрамона мушакбозлик билан якунланди.