O‘zbekiston sobiq prezidenti Islom Karimovning o‘g‘li Pyotr Karimov rafiqasini urgani uchun qo‘lga olindi. U politsiya tomonidan qo‘yib yuborilgach, g‘oyib bo‘ldi. Bu haqda “Izvestiya” xabar berdi.
Ma’lum qilinishicha, er-xotin o‘rtasidagi janjal Moskva viloyatidagi ko‘p qavatli uyda sodir bo‘lgan. Pyotr Karimov xotini Yuliya Smetankinani bir necha bor kaltaklagan. Ayol eng yaqin shifoxonaga olib ketilgan. Shifokorlar ayolga qorin bo‘shlig‘i jarohati, miya chayqalishi va qon ketishi tashxisini qo‘ygan.
Huquq-tartibot idoralari xodimlari Karimovni so‘roqqa tutib, keyin qo‘yib yuborgan, hozirda uning g‘oyib bo‘lgani aytilmoqda. Yuliya Smetankina xavotirda ekani va erining yo‘qolgani yuzasidan ariza yozmoqchiligini bildirgan.
Ayolning aytishicha, janjal pul sababli boshlangan. Pyotr mast holda uyga kelib, xotinidan Toshkentga chipta va mehmonxona uchun pul talab qilgan. Yuliya yetarli puli yo‘qligini aytgan. Pyotr xotiniga baqirib, uning boshiga telefon bilan urgan. Smetankina ilgari eri unga hech qachon qo‘l ko‘tarmagani, er-xotin 3 yillik turmushida hech qachon bunchalik qattiq janjallashmaganini aytgan.
Karimovning rafiqasiga ko‘ra, Pyotrning so‘nggi yillari omadsizliklar bilan o‘tgan. Avvaliga u o‘z vatanida pul uchun aldangan, keyin Rossiyada uning omonatlari saqlangan bank “kuyib ketgan”.
Bundan tashqari, Moskvada o‘zini advokat sifatida tanishtirgan firibgar fuqarolikni olishda va bankdagi pullarni qaytarishda yordam berishini aytib, sobiq prezidentning o‘g‘lidan 6 million 270 ming rubl (78 ming dollar) o‘g‘irlab ketgan.
Pyotr uni aldagan odamga qarshi tergov jarayonlarida qatnashish uchun Toshkentga qaytmoqchi bo‘lgan. U holat yuzasidan asabiylashib, ichishni boshlagan. Hozirda Yuliya eriga nisbatan adovati yo‘qligini aytib, Pyotr g‘oyib bo‘lgani fonida unga yomon narsa bo‘lmaganiga umid qilmoqda.
Izoh (0)