68 ёшли Брюс Уиллиснинг саломатлиги ёмонлашгани ҳақидаги хабар мухлисларни ҳайратда қолдиришда давом этмоқда. Даҳшатли ташхисларга қарамай, биринчи навбатда оиласига ғамхўрлик қилишга қарор қилган юлдузлар ҳақида маълумот берамиз.
Брюс Уиллис
Ташхис — афазия
Шифокорлар Брюс Уиллисга афазия ташхисини қўйгани маълум бўлгач, унинг атрофидаги шовқин (2021 йилда Брюс Уиллисга алоҳида номинация — “Брюс Уиллиснинг энг ёмон ижроси” бўйича “Олтин малина” берилганди) бир зумда тинди. Голливуд саросимага тушиб қолди ва “Олтин малина”ни бекор қилди. Хижолат бўлган танқидчилар кўз олдиларидаги фожиа экрандаги фильм воқеалари эмаслигини бирдан англаб етдилар.
Брюс Уиллиснинг 2012 йилдан бошлаб таниқли америкалик продюсер Рендалл Эмметт билан ҳамкорлик қилишининг сабабини кўпчилик тушунди. Рендалл фильмларини ўта қисқа вақтда, ижодий янгиликларсиз суратга олган ва улар ҳеч қачон дурдона асарлар тоифасига кирмаган. Аммо актёрга пул керак эди, кадрда жуда кам кўринган бўлса-да, Брюс 3-4 миллион доллар гонорар олади. Айтганча, Ал Пачино, Николас Кейж ва бошқа Голливуд юлдузлари ҳам осон топиладиган пул илинжида Эмметт хизматига тез-тез мурожаат қилишган. Афсуски, Рендаллнинг фильмларида Брюс Уиллис наушник тақиб рол ўйнайди: у матнни тўлиқ эслай олмасди ва бундан жуда асабийлашарди.
“У деменсияга чалинган. У билан тўртта фильм устида ишладим. Афсонавий актёрнинг кўз ўнгимизда сўнаётганини кўриш жуда ачинарли. Мен буни сўнгги бир неча йилдан бери кўряпман”, — дейди актёр билан бирга ишлаган режиссёр Метт Эскандари.
Касаллик тез ривожланарди ва Брюс Уиллис оиласини таъминлашга шошиб қолди. У рафиқаси Эмма Хеминг ва икки нафар ёш қизи келажакда моддий қийинчиликларни бошдан кечиришини истамади. Шунинг учун Брюс шошилинч равишда кўчмас мулкини сотди ва шон-шуҳратига қўл силтаб, савияси паст фильмларда рол ўйнай бошлади.
Брюс Уиллис актёрлик фаолиятини якунлаганини эълон қилганида кўпчиликнинг қалби бўшаб қолди. Шундан сўнг у ҳар бир кунини қариндошлари ва яқинлари даврасида ўтказади, тез орада кунларнинг ҳисобини йўқотади ва касаллик унинг хотирасини парчалаётганини ҳис қилади.
Аммо Брюсга оиласи кучли таянч бўлди. Собиқ рафиқаси Деми Мур ажрашганига қарамай, Уиллис ҳаётида доимо муҳим ўрин эгаллаган.
“Барча мухлисларга шуни маълум қиламизки, севимли Брюсимиз соғлиғида муаммоларга дуч келган ва яқинда унга когнитив қобилиятига таъсир қилувчи афазия ташхиси қўйилган. Шу сабабли Брюс ўзи учун жуда муҳим бўлган карьерасидан воз кечмоқда. Ҳозир оиламиз учун жуда қийин давр, биз доимий севгингиз, ҳамдардлигингиз ва қўллаб-қувватлаганингиз учун жуда миннатдормиз. Бутун оиламиз билан буни бошдан кечирмоқдамиз ва бу ҳақда унинг мухлисларига хабар беришни хоҳладик. Биз унинг сиз учун қанчалик муҳимлигини ва сиз у учун қанчалик муҳимлигингизни биламиз”, — деган Деми мухлисларга мурожаат қилиб.
Робин Уильямс
Ташхис: Паркинсон касаллиги
Робин ўзининг оқкўнгиллиги, соддалиги билан бошқа Голливуд юлдузларидан фарқ қиларди. Унинг самимий табассумида бироз қайғу яширинганди. У ҳеч қачон ҳеч ким билан жанжаллашмаган ва бунга тоқати ҳам йўқ эди. Робин ҳатто бу ҳақда шундай ҳазил ҳам қилади: “Ҳеч қачон хунук одамлар билан уришманг. Уларнинг йўқотадиган ҳеч нарсаси йўқ”.
Шон-шуҳратига қарамай, Робин Уильямс ўзини вакуумда яшаётгандек ҳис қилди. Болалигидан тўкин-сочинликда, ҳеч нарсага муҳтожлигини билмай ўсган бўлса-да, ота-она эътиборидан, меҳридан маҳрум, ёлғизлик туйғуси қалбида бир умр сақланиб қолди. Буюк комедиячи, айниқса, аёллар билан муносабатларда мукаммал эмасди. Учта никоҳ, доимий хиёнат, албатта, унинг беқарорлигидан далолат беради. Бироқ Робин танлаганларини чин дилдан ва меҳр билан севди, болаларига эҳтиёткорлик ва ғамхўрлик билан муносабатда бўлди. Робин ўзини аямасди — ҳамма учун керакли бўлишга интилиб, барчага ёрдам берди.
“Ўзинг ёрдамга муҳтожлигингни тан олиш жуда қийин, лекин буни тан олганингда осонроқ бўлади”, — дейди Робин.
Шифокорлар унга Паркинсон касаллиги ташхисини қўйишганда актёр сезиларли даражада саросимага тушади, кейин эса шошилади. Келажакда фаровон яшаши учун уч нафар фарзандига жамғарма тузади. У ўзининг ҳашаматли саройини 30 миллион доллардан кўпроққа сотишга ҳаракат қилади, аммо улгурмайди. Касаллик ўз таъсирини ўтказади — унинг руҳиятини аста-секин йўқ қилади, у асабийлашади, ҳамма нарса қўлидан тушиб кетаверади. Таъсирчан, нозик, заиф қалб билан Робин ўзини олдинги ҳаётидан ташқарида тасаввур қила олмайди ва янги, яқинлашиб келаётган оғриқли ҳаёт уни эзади. 63 ёшида ҳамшира назорати остида “сабзавот” бўлиб, маъносиз нигоҳлари билан атрофга қараб, ҳеч кимни танимайди. Робин Уильямс 2014 йил 11 август куни ўз жонига қасд қилади.
“Мен ўлсам, қабрим устида ичинг, рақсга тушинг — хоҳлаганингизни қилинг. Фақат мени клонлаштирманг, чунки клоним ҳеч қачон мендек бўлолмайди”, — дея ҳазил қилганди машҳур актёр.
Селма Блер
Ташхис — тарқоқ атеросклероз
“Шафқатсиз ўйин” фильми юлдузи Селма Блернинг сўзларига кўра, у дастлаб тақдир томонидан сийланган. У бадавлат оилада туғилган, ҳамма уни яхши кўрган ва эркалаб суйган. Ўз мақсадига эришиш — орзу қилинган Голливудга кириш учун назокатли ва жозибали қиз ўзини ортиқча уринтирмайди. Селманинг ижодий фаолияти жуда муваффақиятли бўлди, у 70 та фильмда рол ўйнади ва изланувчан актрисалардан бири сифатида тан олинди. Унинг дизайнер Жейсон Блик билан ишқий муносабатлари 2011 йилда ўғли Артурни дунёга келтириши билан якунланди. Албатта, Селма Блернинг оналик бахтининг чеки йўқ эди.
Бироқ актрисанинг қувончига шифокорга навбатдаги ташрифи соя солади. Гап шундаки, Селма кўп йиллар давомида мушак оғриғидан азоб чеккан, доимий заифлик уни том маънода йиқитди. Бу сафар ташхис аниқ ва шубҳасиз бўлди: шифокорлар Голливуд юлдузида тарқоқ атеросклероз борлигини аниқлайдилар.
“Касаллик симптомлари анчадан бери бор эди, — дейди Селма. — Буни жиддий қабул қилмадим. Ҳаммаси оғриққа чидолмай, даволаниш учун шифокорга борганимда бошланди. Кейин эса сўнгги 15 йил давомида ҳақиқий касаллик аломатларига кўз юмганимни англадим. Ниҳоят соғлиғим билан боғлиқ вазиятга ойдинлик киритганимдан хурсандман”.
Шундан кейин Селма Блернинг ҳаёти касаллик билан оғир, машаққатли курашга айланади.
“
Менга ўлим ҳолатига режалар тузишни маслаҳат беришди. Менда склероз борлиги учун эмас, балки унга қарши курашаётганим учун”.
Аммо у бошига тушган синовларга таслим бўлмади, чунки унинг ёнида дунёдаги энг азиз одами — ўғли Артур бор. Айнан Артур учун, унинг келажаги учун Селма бор кучи билан ишлашга ҳаракат қилди ва бу қанчалик қийинлигини унга билдирмади. Ўтган йилнинг октябрь ойида Голливуд юлдузи Рейчел Флейт режиссёр бўлган ҳужжатли фильмни тақдим этди, унда актриса бошидан кечирган изтироблари ҳақида гапирди. У тақдимот маросимида тақдир зарбалари остида синмаган, юзида ширин табассум билан қўлтиқтаёқда саҳнага чиқди. Меҳмонлар уни қарсаклар билан кутиб олишди, бу ғайриоддий аёлнинг жасоратига қойил қолишди.
Селма Блер ўзининг эски ҳаётини давом эттириш учун курашмоқда. Бир марта у ўғли Артур билан бирга фотосессия ҳам уюштирди: иккаласи ҳам энг яхши мода уйларининг либосларида суратга тушди. Селманинг айтишича, ўғлини унга ўхшатишса, ўзида йўқ қувонади.
Изоҳ (0)