Россиянинг Краснодар ўлкаси ва Ростов вилоятида жойлашган нефтни қайта ишлаш заводлари 4 майга ўтар кечаси дронлар ҳужумига учради, деб хабар беради Meduza.
Қайд этилишича, ҳужумга учраган “Илинский” ва “Новошахтинский” заводларида ёнғинлар юзага келган бўлиб, олов масъул ходимлар томонидан ўчирилган. 3 майга ўтар кечаси Краснодар ўлкасининг Таман порти яқинида нефть маҳсулотлари бўлган резервуар ёниб кетганди. Ёнғин деярли бир сутка давомида ўчирилган.
“Заводнинг энди қурилаётган цехлараро эстакадаси конструкциясига учувчисиз учиш аппарати келиб урилиб, портлаб кетди. Портлаш оқибатида юзага келган ёнғин зудлик билан ўчирилди. Ўт ўчирувчилар ёнғинни бартараф этишга жалб этилмаган, корхонанинг махсус кучлари томонидан ўчирилган”, — деб ёзади Ростов губернатори Василий Голубев.
Мазкур нефтни қайта ишлаш заводи 2022 йилда ҳам дронлар ҳужумига учраган эди. 22 июнда корхонага иккита дрон зарба бериши натижасида ёнғин юзага келганди. Ўшанда ФВВ 50 метр квадрат ҳудуд ёнгани ва ҳеч ким жабрланмаганини маълум қилган.
Россия ҳукумати 3 май куни Кремлга иккита дрон ҳужум қилгани тўғрисида хабар берганди. Владимир Путин матбуот хизмати содир бўлган воқеани “президентга суиқасд” деб атади, бироқ унинг кечаси Кремлда бўлиши эҳтимоллиги жуда кам. BBC Кремлга уюштирилган ҳужум бўйича расмий версия эълон қилинганидан кейин ҳам жавобсиз қолаётган саволларга тўхталиб ўтди.
Изоҳ (0)