Херсон вилояти 3 май куни Россия армияси томонидан ўққа тутилиши оқибатида 21 киши ҳалок бўлди, яна 48 киши жароҳатланди. Украина президенти Владимир Зеленский маълум қилди.
Ҳалок бўлганларнинг барчаси тинч аҳоли экани айтилмоқда. Украина Бош прокуратураси маълумотларига кўра, россиялик ҳарбийлар “тартибсиз” ўққа тутишни амалга оширган, снарядлар фуқаролик инфратузилмаларига, жумладан, маҳаллий “АТБ” супермаркет ва вокзалга келиб тушган.
“Темир йўл вокзали ва кесиб ўтиш йўли, уй, қурилиш дўкони, озиқ-овқат супермаркет, автозаправка — бу жойларни нима бирлаштириб туришини биласизми? Россия ўз снарядлари билан тинч аҳолини ўлдирган ҳолда қолдираётган қонли из”, — деган Зеленский.
Шунингдек, маълум қилинишича, Херсон вилоятидаги бир нечта аҳоли пункти ҳам ўққа тутилган. Херсонда жами 16 киши ҳалок бўлган. Бош прокуратура уруш қонунлари ва одатларини бузиш моддаси бўйича судгача тергов бошлаган.
Россия Украинага кенг кўламли босқинининг бошидаёқ Херсонни эгаллаб олган. 2022 йил ноябрда Россия мудофаа вазири Сергей Шойгу қўшинларга шаҳардан Днепрнинг чап қирғоғига чекинишни буюрган. Россия ҳукумати ўшанда ўз қарорини “ҳарбий зарурат” дея изоҳлаганди. Чекиниши билан улар шаҳарни мунтазам ўққа тутишни бошлаган.
Изоҳ (0)