Germaniyaga tashrif doirasida Shavkat Mirziyoyev va Germaniya prezidenti Frank-Valter Shtaynmayer Berlin shahridagi jahonga mashhur Jeyms Simon galereyasida “O‘zbekistonning arxeologik xazinalari. Makedoniyalik Iskandardan Kushonlar saltanatigacha” nomli noyob ko‘rgazmani ochdi. Bu haqda Prezident matbuot xizmati xabar berdi.
Davlat rahbari ochilish marosimida ikki mamlakat xalqlarining boy madaniy merosi va bugungi yutuqlariga qiziqish ortib borayotganini mamnuniyat bilan qayd etgan. Ko‘rgazmaning ochilishi O‘zbekiston va Germaniya o‘rtasidagi madaniy aloqalarda diqqatga sazovor voqea bo‘ldi. Uning o‘tkazilishi haqida Germaniya federal prezidenti Frank-Valter Shtaynmayerning 2019-yil maydagi O‘zbekistonga tashrifi chog‘ida kelishilgan edi.
Qayd etilishicha, qariyb to‘rt yil davomida ikki mamlakat arxeologlari, tarixchilari, sanʼatshunoslari va muzey xodimlari tadbirni tashkillashtirish ustida fidokorona mehnat qilgan. Germaniyalik mutaxassislar ishtirokida 50 ga yaqin eng qimmatli osori-atiqalar restavratsiya qilingan.
2024-yil 14-yanvar kuniga qadar davom etadigan ko‘rgazmada Berlin davlat muzeylari to‘plamlaridan 65 ta va O‘zbekiston muzeylari to‘plamlaridan 285 ta eksponat namoyishga qo‘yilgan. Ularning ko‘pi O‘zbekiston tashqarisida ilk bor ko‘rsatilmoqda.
Ko‘rgazma mamlakatning qadimiy va boy madaniyati, bugungi O‘zbekiston va Markaziy Osiyo hududida joylashgan ilk davlatlarning miloddan avvalgi VI asrdan milodiy IV asrgacha bo‘lgan davrni qamrab olgan tarixi haqida so‘zlaydi. Bu yerdagi durdonalar orasida Kushon saltanatining Dalvarzintepa va Holchayon qo‘rg‘onlaridan topilgan aslzodalar, askar va badavlat ayollar haykallari bor.
“Ushbu betakror ekspozitsiya tashrif buyuruvchilarga O‘zbekiston tarixi bilan tanishish, xalqimiz merosi to‘g‘risida to‘liq tasavvur hosil qilish imkonini beradi”, — deyiladi xabarda.
Tadbir O‘zbekiston va Germaniya xalqlarining yanada yaqinlashishi va bir-birini anglashiga, ikki mamlakat o‘rtasidagi keng muloqot va ko‘p qirrali hamkorlikning rivojlanishiga xizmat qiladi. O‘zbekiston prezidentining Germaniyaga tashrifi munosabati bilan ikki mamlakat delegatsiyalari aʼzolari, davlat va jamoat arboblari ishtirokida qabul marosimi bo‘lib o‘tdi.
O‘zbekiston prezidenti Shavkat Mirziyoyevning Germaniyaga ikki kunlik tashrifi yakunlandi. Tashrif dasturidagi tadbirlar yakunlangach, “Berlin-Brandenburg” aeroportida oliy martabali mehmonni Germaniyaning rasmiy shaxslari kuzatib qo‘ydi. Davlat rahbari Toshkentga jo‘nab ketdi.
Izoh (0)