Futbol bo‘yicha O‘zbekiston Superligasi doirasida 20-may kuni o‘tishi rejalashtirilgan “Nasaf” — “Paxtakor” uchrashuvi qoldirildi. Bu haqda PFL matbuot xizmati ma’lum qildi.
Qayd etilishicha, “Paxtakor” klubi uchrashuvni qoldirishni so‘rab tashkilotga murojaat qilgan.
Gap shundaki, “Paxtakor” klubining bir qancha a’zosi 20-maydan 11-iyunga qadar Argentinada o‘tadigan U-20 Jahon chempionatiga yo‘l oladi. Ayni vaqtda Ravshan Haydarov qo‘l ostidagi terma jamoaga Toshkent klubining bir yo‘la 8 nafar a’zosi jalb qilingan: Otabek Boymurodov, Diyorbek Ortiqboyev, Abubakr Ashurov, Abbos Fayzullayev, Shahzodbek Rahmatullayev, Behruz Asqarov, Po‘latxo‘ja Xoldorxonov, Rustam Turdimurodov.
Reglamentga ko‘ra, klubning uch yoki undan ko‘p vakili turli yoshdagi terma jamoaga jalb qilinadigan bo‘lsa, klub rasmiy o‘yinni boshqa sanaga ko‘chirishni so‘rab murojaat qilish huquqiga ega. PFL ushbu huquqdan foydalangan “Paxtakor”ning so‘rovini qanoatlantirgan.
Tashkilot bayonotida qayd etilishicha, “Paxtakor” shu vaqtga qadar ko‘chirishlarsiz o‘yinlar o‘tkazishga muvaffaq bo‘ldi. Biroq jamoada jarohatlar bilan bog‘liq muammolar ko‘paygach, poytaxt klubi murojaat bilan chiqishga majbur bo‘lgan.
Avvalroq “Nasaf” klubining OCHLdagi ishtiroki sabab O‘zbekiston Superkubogi o‘yini qoldirilgandi. PFL ushbu holatga ham to‘xtalib, “Paxtakor” va “Nasaf” o‘rtasidagi Superkubok hamda Superliga o‘yinlarining taxminan qachon o‘tkazilishi borasida tushuntirish berdi.
“Iyun oyida Srechko Katanes O‘zbekiston milliy terma jamoasini FIFA kunlaridan avvalroq yig‘ishga majbur bo‘layotganini hisobga olsa, 2022-yilgi mavsum sovrindorlari ishtirokidagi har ikki o‘yin iyul yoki avgust oylarida o‘tkazilishi mumkin. Liga bu haqda keyinroq qaror qabul qiladi. Boisi biz OFK tomonidan Chempionlar ligasining 2023/24 yilgi mavsumiga qur’a tashlanishini kutishga majburmiz”, — deyiladi bayonotda.
Izoh (0)