Футбол бўйича Ўзбекистон Суперлигаси доирасида 20 май куни ўтиши режалаштирилган “Насаф” — “Пахтакор” учрашуви қолдирилди. Бу ҳақда ПФЛ матбуот хизмати маълум қилди.
Қайд этилишича, “Пахтакор” клуби учрашувни қолдиришни сўраб ташкилотга мурожаат қилган.
Гап шундаки, “Пахтакор” клубининг бир қанча аъзоси 20 майдан 11 июнга қадар Аргентинада ўтадиган U-20 Жаҳон чемпионатига йўл олади. Айни вақтда Равшан Ҳайдаров қўл остидаги терма жамоага Тошкент клубининг бир йўла 8 нафар аъзоси жалб қилинган: Отабек Боймуродов, Диёрбек Ортиқбоев, Абубакр Ашуров, Аббос Файзуллаев, Шаҳзодбек Раҳматуллаев, Беҳруз Асқаров, Пўлатхўжа Холдорхонов, Рустам Турдимуродов.
Регламентга кўра, клубнинг уч ёки ундан кўп вакили турли ёшдаги терма жамоага жалб қилинадиган бўлса, клуб расмий ўйинни бошқа санага кўчиришни сўраб мурожаат қилиш ҳуқуқига эга. ПФЛ ушбу ҳуқуқдан фойдаланган “Пахтакор”нинг сўровини қаноатлантирган.
Ташкилот баёнотида қайд этилишича, “Пахтакор” шу вақтга қадар кўчиришларсиз ўйинлар ўтказишга муваффақ бўлди. Бироқ жамоада жароҳатлар билан боғлиқ муаммолар кўпайгач, пойтахт клуби мурожаат билан чиқишга мажбур бўлган.
Аввалроқ “Насаф” клубининг ОЧЛдаги иштироки сабаб Ўзбекистон Суперкубоги ўйини қолдирилганди. ПФЛ ушбу ҳолатга ҳам тўхталиб, “Пахтакор” ва “Насаф” ўртасидаги Суперкубок ҳамда Суперлига ўйинларининг тахминан қачон ўтказилиши борасида тушунтириш берди.
“Июнь ойида Сречко Катанец Ўзбекистон миллий терма жамоасини ФИФА кунларидан аввалроқ йиғишга мажбур бўлаётганини ҳисобга олса, 2022 йилги мавсум совриндорлари иштирокидаги ҳар икки ўйин июль ёки август ойларида ўтказилиши мумкин. Лига бу ҳақда кейинроқ қарор қабул қилади. Боиси биз ОФК томонидан Чемпионлар лигасининг 2023/24 йилги мавсумига қуръа ташланишини кутишга мажбурмиз”, — дейилади баёнотда.
Изоҳ (0)