“PSJ” ultrasi klub ofisi yonida namoyish o‘tkazdi va rahbariyatdan iste’fo talab qildi.
Aksiya Collectif Ultras Paris (CUP) tomonidan tashkil etilgan. Ular “tizimli va aqlli harakat evaziga oldinga yurishga erishish” maqsadini shior sifatida ko‘rsatgan.
RMC Sport xabariga ko‘ra, “PSJ” ofisi oldida klubning yuzlab muxlislari to‘plangan. Ular o‘zi bilan turli bannerlar va pirotexnika vositalarini olib kelgan.
Muxlislar prezident Nossir al-Heylayfidan iste’fo talab qilgan. Shuningdek, Neymar, Lionel Messi, Marko Veratti kabi futbolchilarni ham ketkazib yuborishni talab qilgan.
Bu kemada kapitan yo‘q. Bizga aktual mavzularga e’tibor qaratadigan, iltimos qilinganda biz bilan yuzma-yuz gaplashadigan prezident kerak. Futbolchilar tufayli yil davomida sharmanda bo‘lyapmiz, — deydi ultras rahbari Romen Mabil.
Ofis oldiga yig‘ilgan muxlislar Messiga nisbatan haqoratli so‘zlarni ishlatgan. Shuningdek, Neymarning Parijdagi hovlisi atrofida ham muxlislar yig‘ilgan va futbolchidan ketishni talab qilgan.
Avvalroq Messi Liga 1 doirasidagi mag‘lubiyatli o‘yindan keyin Saudiya Arabistoniga beso‘roq ketib qolgani sabab klub tomonidan ikki haftaga o‘yin va mashg‘ulotlardan chetlatilgani xabar qilingandi.
OAVga ko‘ra, argentinalik futbolchi yozda Parij klubini tark etadi. Unga Saudiya Arabistoni klublari va “Barselona”dan qiziqish bor. Uning “PSJ” bilan amaldagi shartnomasi mavsum yakunida o‘z nihoyasiga yetadi.
35 yoshli futbolchi Fransiya chempionatining joriy mavsumida 28 ta o‘yin o‘tkazib, 15 tadan gol va golli uzatma muallifiga aylandi.