O‘zbekistonning yirik shaharlari Yevropa shaharlari qatorida yashil qoplamalar tizimiga kiritiladi. Bu haqda Tabiat resurslari vazirligi axborot xizmati xabar berdi.
Shveysariyaga tashrif davomida vazir Aziz Abduhakimov hamda BMT Yevropa iqtisodiy komissiyasi (YIK) ijrochi kotibi, BMT bosh kotibi o‘rinbosari O.Algayerova, YIK Atrof muhit departamenti direktori M.Kayner, YIK mintaqiy maslahatchisi S.Radnaaragcha va Havoning uzoq masofalargacha transchegaraviy ifloslanishi to‘g‘risidagi konvensiya (Havo konvensiyasi) kotibi A.Karadjova o‘rtasida uchrashuv o‘tkazildi.
2-may kuni bo‘lib o‘tgan uchrashuvda O.Algayerova Toshkent xalqaro investitsiya forumi yuqori saviyada tashkil etilganini ta’kidlab, buning uchun prezident Shavkat Mirziyoyevga minnatdorlik bildirdi. U forum “yashil” investitsiyalar, transport, turizm, ta’lim va boshqa muhim sohalarni rivojlantirish uchun mintaqaviy xabga aylanayotganini ta’kidladi.
O‘z o‘rnida yashil investitsiyalar, xususan, chiqindi va karbon tashlamalarni hisoblash tizimi sohasiga xorijiy investorlarni jalb qilish hamda mahalliy tadbirkorlar uchun davlat-xususiy sherikchiligi tizimini xalqaro standartlarga va prinsiplarga asosan optimallashtirish bo‘yicha normativ-huquqiy hujjatlar YIK xalqaro ekspertlari tomonidan qayta ko‘rib chiqilishi bo‘yicha kelishuvga erishildi.
Bundan tashqari, shaharlarda havoning ifloslanishi yuqori darajaga ko‘tarilganini hisobga olgan holda Havo konvensiyasi kotibi bilan konvensiyaga a’zo bo‘lish istiqbollari va ratifikatsiya davrida xalqaro metodologiya, huquqiy instrumentlar va ilg‘or tajriba asosida havo sifatini yaxshilash uchun chora-tadbirlar rejasini ishlab chiqishga kelishildi.
BMT bosh kotibi o‘rinbosari forum doirasida Samarqandga tashrif buyurib, O‘zbekiston prezidenti tashabbusi bilan Turkiy davlatlar tashkiloti yig‘ilishi doirasida Registonda ekilgan daraxtlarni alohida e’tirof etdi. Bu aynan YIKning “Shaharlarda daraxtlar” tashabbusida namuna sifatida namoyish etilishini ma’lum qildi.
Yuqoridagilarni inobatga olib, “Shaharlarda daraxtlar” tashabbusiga “Yashil makon” doirasida ekilgan daraxtlar statistikasini integratsiya qilish va O‘zbekistonning yirik shaharlarini Yevropa shaharlari qatorida yashil qoplamalar tizimiga kiritishga kelishildi.
Uchrashuv yakunida BMT Yevropa iqtisodiy komissiyasi Samarqand shahrida bo‘lib o‘tadigan BMTning uchta yirik tadbiri – cho‘llanish bo‘yicha global tadbir (UNCCD CRIC-21), Yovvoyi hayvonlarning ko‘chib yuruvchi turlarini saqlab qolishga doir konvensiyasining 14-Tomonlar konferensiyasi (CMS COP-14) va Butunjahon turizm tashkiloti (UNWTO) Bosh assambleyasining 25-sessiyasiga taklif etildi.
Izoh (0)