Ўзбекистоннинг йирик шаҳарлари Европа шаҳарлари қаторида яшил қопламалар тизимига киритилади. Бу ҳақда Табиат ресурслари вазирлиги ахборот хизмати хабар берди.
Швейцарияга ташриф давомида вазир Азиз Абдуҳакимов ҳамда БМТ Европа иқтисодий комиссияси (ЕИК) ижрочи котиби, БМТ бош котиби ўринбосари О.Алгаерова, ЕИК Атроф муҳит департаменти директори М.Кайнер, ЕИК минтақий маслаҳатчиси С.Раднаарагча ва Ҳавонинг узоқ масофаларгача трансчегаравий ифлосланиши тўғрисидаги конвенсия (Ҳаво конвенсияси) котиби А.Караджова ўртасида учрашув ўтказилди.
2 май куни бўлиб ўтган учрашувда О.Алгаерова Тошкент халқаро инвестиция форуми юқори савияда ташкил этилганини таъкидлаб, бунинг учун президент Шавкат Мирзиёевга миннатдорлик билдирди. У форум “яшил” инвестициялар, транспорт, туризм, таълим ва бошқа муҳим соҳаларни ривожлантириш учун минтақавий хабга айланаётганини таъкидлади.
Ўз ўрнида яшил инвестициялар, хусусан, чиқинди ва карбон ташламаларни ҳисоблаш тизими соҳасига хорижий инвесторларни жалб қилиш ҳамда маҳаллий тадбиркорлар учун давлат-хусусий шерикчилиги тизимини халқаро стандартларга ва принципларга асосан оптималлаштириш бўйича норматив-ҳуқуқий ҳужжатлар ЕИК халқаро экспертлари томонидан қайта кўриб чиқилиши бўйича келишувга эришилди.
Бундан ташқари, шаҳарларда ҳавонинг ифлосланиши юқори даражага кўтарилганини ҳисобга олган ҳолда Ҳаво конвенсияси котиби билан конвенсияга аъзо бўлиш истиқболлари ва ратификация даврида халқаро методология, ҳуқуқий инструментлар ва илғор тажриба асосида ҳаво сифатини яхшилаш учун чора-тадбирлар режасини ишлаб чиқишга келишилди.
БМТ бош котиби ўринбосари форум доирасида Самарқандга ташриф буюриб, Ўзбекистон президенти ташаббуси билан Туркий давлатлар ташкилоти йиғилиши доирасида Registonда экилган дарахтларни алоҳида эътироф этди. Бу айнан ЕИКнинг “Шаҳарларда дарахтлар” ташаббусида намуна сифатида намойиш этилишини маълум қилди.
Юқоридагиларни инобатга олиб, “Шаҳарларда дарахтлар” ташаббусига “Яшил макон” доирасида экилган дарахтлар статистикасини интеграция қилиш ва Ўзбекистоннинг йирик шаҳарларини Европа шаҳарлари қаторида яшил қопламалар тизимига киритишга келишилди.
Учрашув якунида БМТ Европа иқтисодий комиссияси Самарқанд шаҳрида бўлиб ўтадиган БМТнинг учта йирик тадбири – чўлланиш бўйича глобал тадбир (UNCCD CRIC-21), Ёввойи ҳайвонларнинг кўчиб юрувчи турларини сақлаб қолишга доир конвенсиясининг 14-Томонлар конференцияси (CМS COP-14) ва Бутунжаҳон туризм ташкилоти (UNWTO) Бош ассамблеясининг 25-сессиясига таклиф этилди.
Изоҳ (0)